Переведенцев: Бүген Татарстанда соңгы вакыттагы иң эссе көн булачак

Шимбә, 8 июльдә, Татарстанда соңгы вакыттагы иң эссе көн булачак. Бу хакта Казан федераль университеты профессоры, география фәннәре докторы Юрий Переведенцев кисәтте, дип яза уку йортының матбугат хезмәте.

Профессор сүзләренчә, республикада 8-12 июль көннәрендә уртача тәүлеклек температура климатик нормадан (якынча 20,5 градус) 4-5 градуска артып китәчәк. Ә шимбә көнне уртача температура 27 градуска кадәр үк күтәреләчәк, диде ул.

Шулай ук, Юрий Переведенцев төбәктә температура рекордлары көтелми диде. Ул, КФУ метеостанциясе мәгълүматлары буенча, 1911 елның 7 июлендә Казанда температура 36,2 градусны тәшкил иткән дип искә төшерде.

Татарстан Гидрометеорология үзәге мәгълүматлары буенча, бүген Татарстанда алмашынучан-болытлы, явым-төшемнәрсез һава торышы саклана. Көньяктан, көньяк-көнбатыштан 3-8 метр тизлектә җил исәчәк. Көндез республика буенча җил тизлеге 12 метрга кадәр көчәергә мөмкин.

Республикада төнлә һава температурасы 11 градустан (Азнакайдагы метеостанция мәгълүматлары буенча) 20,5 градуска кадәр (Казан-Опорная метеостанциясе мәгълүматлары буенча) җитте. Көндез һава температурасы 30-35 градус (Казанда +32...+34 градус) булачак.

Алдарак «Татар-информ» Татарстанга салкынча һава торышы якынлаша дип хәбәр иткән иде.