Башкортстанның Чишмә бистәсе Җиңү паркында Ми-24 сугышчан вертолетына һәйкәл ачылды
Шимбә көнне, 29 апрельдә, Башкортстанның Чишмә бистәсендә республика Башлыгы Радий Хәбиров Җиңү паркында булды, анда тантаналы төстә Ми-24 сугышчан вертолетына һәйкәл ачылды. Бу хакта «Башинформ» агентлыгы хәбәр итә.
Мондый төрдәге машиналарда Россия Герое, атказанган хәрби очучы, авиация генерал-майоры Риф Сәхәбетдинов эшләгән. 60нчы елларда ул Чишмә районының Келәш авылы урта мәктәбендә укыган.
2021 елда Чишмә районы хакимияте сугыш хәрәкәтләре ветераны инициативасы буенча Ростех дәүләт корпорациясенә патриотик максатларда монумент булдыру өчен вертолетны тапшыру мөмкинлеге турында хат белән мөрәҗәгать итә. Республика ярдәме белән 2022 елда сугышчан машинаны Новосибирскидан Чишмәгә алып кайталар һәм аңа реставрация ясыйлар.
Башкортстан Башлыгы бистәдә яшәүчеләрне әлеге истәлекле вакыйга белән котлады.
«Бүген без Чишмә бистәсендә сугышчан вертолетка һәйкәл ачабыз. Бу эш якташыбыз Риф Сәхәбетдиновның тырышлыгы белән гамәлгә ашырылды. Ул чыннан да чын сугышчы, Россия Герое, оста вертолетчы. Бу безнең өчен зур мәртәбә. Риф Рәисович, сезгә шундый инициатива белән чыкканыгыз өчен рәхмәт әйтәсем килә. Туган җирегезне онытмавыгыз өчен рәхмәт сезгә. Бездә 4 май көнне зур чара – «Атайсал» республика форумы узачак. Анда үзенең кече Ватанына ярдәм итүчеләрне хөрмәтләячәкбез», - диде Радий Хәбиров.
Россия Герое, сугыш хәрәкәтләре ветераны Риф Сәхәбетдинов әлеге инициативаны хуплаганы өчен республика җитәкчелегенә рәхмәт белдерде.