Йөрүзәндә 1996 елда алынган җир урынында мәчет төзелеше башланды
Чиләбе өлкәсе Йөрүзән шәһәрендә яңа мәчет һәм мәдрәсә нигезенә таш салынды, дип хәбәр итә Чиләбе татар конгрессы. Мәчет өчен урын 1996 елда ук бирелгән булган.
Тантаналы вакыйгада Чиләбе һәм Урал Федераль округы мөфтие Ринат хәзрәт Раев, өлкәнең барлык шәһәрәре имам-хатыйблары, Чиләбе өлкәсе татар конгрессы рәисе, өлкә парламенты депутаты Лена Колесникова, «Рождество Христова» храмы настоятеле Петр Назаров, иганәче Михаил Бабак, шәһәр җитәкчеләре, Татарстан һәм Башкортстаннан кунаклар катнашкан.
Мәчет һәм мәдрәсә нигезенә таш салуда һәркем катнашты, диелә хәбәрдә.
Тантана «Иман-Нәргиз» мәчете мәйданчыгында узган. Фатиха сүрәсен укыгач, Ринат Раев чыгыш ясаган. «Ринат Раев махсус операция вакыйгаларын телгә алды, анда Ватанның данын яклап мөселманнар да, православныйлар да иңгә иң сугыша», – диелә хәбәрдә.
Лена Колесникова «Барс-Каскад» разведка отряды командиры Олег Колесниковтан котлау тапшырган, ДНРда булганда аның белән очрашуы турында сөйләгән. Ул Йөрүзән мәчете, өлкән яшьтәге Әхмәткамәл хәзрәткә бүләк – чәкчәк тапшырган. «Иман-Нәргиз» мәчете Колесниковага чәчәкләр бәйләме бүләк иткән.
Иганәче Михаил Бабак Белоруссиядә туган, Йөрүзәндә гаилә төзегән, ул православ храмнарга да, мәчетләргә дә ярдәм итә. Яңа мәчеткә ул бер миллион сум биргән. Йөрүзән шәһәре мэры Александр Добровольский Илдар хәзрәткә символик бүләк – мастерок һәм чүкеч бүләк иткән.
Йөрүзәндә 3 меңгә якын мөселман яши, хәзер анда кечкенә генә «Иман-Нәргиз» мәчете бар, анда 70-150 кеше йөри. 2012 елдан мәчетне Әхмәткамәл Хәлиуллин җитәкли. Ул ун ел буе хезмәт итә, хәзер лаеклы ялда, яңа имам Илдар Кәримовка ярдәм итә.