Новости за 25.04.2023

Уфада Башкортстанның һәм Россиянең атказанган мәдәният хезмәткәре, виртуоз-кубызчы Роберт Заһретдиновка һәм аның хатыны, Башкортстанның халык артисты Равилә Хаҗиева-Заһретдиновага истәлек такталары ачылды.

Башкортстанның бер авылында яшәүче хатын-кыз йоклап яткан кызына пычак белән ташланган. Яралы кызга әтисе беренче ярдәм күрсәткән, ә шикләнелгән хатын-кызны психиатрия хастаханәсенә алып киткәннәр. Бу хакта Россия Тикшерү комитетының Башкортстан буенча Тикшерү идарәсенә сылтама белән РИА Новости хәбәр итә.

«Зәкят» хәйрия фонды «Рамазан – изге гамәлләр ае» хәйрия марафоны кысаларында 7098 кешегә ярдәм күрсәтте.

24-25 апрельдә Казанда Гаяз Исхакыйның тууына 145 ел булуга багышланган «Парадигмалар алмашыну шартларында татар белеме: теория, методология, гамәл» халыкара фәнни-гамәли семинар үтә.

Федераль законнарга яшүсмерләрне эшкә урнаштыру өлешендә төзәтмәләр кертергә кирәк, хәзер алар турында фикер алышалар. Бу хакта Татарстан яшьләр эшләре министры Ринат Садыйков хәбәр итте.

Татарстан Язучылар берлеге рәисе Ркаил Зәйдулла җитәкчелегендә язучылар шагыйрь Габдулла Тукай торган авыл - Арча районы Кырлайда шигърият бәйрәмендә катнашты. Алар Кырлай музее комплексын карады, Габдулла Тукай һәйкәленә чәчәкләр салды.

Татарстанда коронавирус белән авыручылар саны кимүен дәвам итә. Соңгы тәүлектә ковид йоктыруның 31 очрагы расланган, 15 кешене хастаханәгә китергәннәр. Бу хакта стопкоронавирус.рф. порталында хәбәр ителә.

Татарстанда быел юл эшләренә, зур проектларны гамәлгә ашыруны исәпкә алып, 250 млрд сум тоту планлаштырыла. Бу хакта ТР Министрлар Кабинетында узган брифингта Татарстан транспорт һәм юл хуҗалыгы министры Фәрит Хәнифов хәбәр итте.

Бөтенроссия онлайн-тавыш бирү юлы белән төзекләндерү өчен объектлар сайлау халыкны территорияләр белән идарә итүгә чакыра. Хакимият халыкның сүзен ишетә һәм уңайлы шәһәр мохитен формалаштырганда аларның теләкләрен исәпкә ала. Бу хакта Дәүләт Думасы депутаты Олег Морозов белдерде.

Бүген «Сәйдәш» мәдәният үзәгендә Татар теле һәм әдәбиятыннан халыкара олимпиаданың җиңүчеләрен бүләкләделәр.

Бүген Түбән Кама журналисты, «Татмедиа» АҖ медиахолдингының филиалы – «НТР» хезмәткәре Александр Комаровның һәлак булуы турында билгеле булды. Бу хакта Александрның хатыны Яна Енькова хәбәр итте.

Татарстан Язучылар берлеге рәисе Ркаил Зәйдулла җитәкчелегендә язучылар шагыйрь Габдулла Тукайның туган авылы Кушлавычта кунакта булды. Алар Кушлавыч музеен карады, Тукайның әтисе Мөхәммәтгариф Мөхәммәтгалимовның каберен зиярәт калды һәм Габдулла Тукай туган йорт нигезендә куелган бюстка чәчәкләр салды.

1 майдан Россиядә кайбер категориягә керүче кешеләргә пенсия арта. Бу хакта «Прайм» агентлыгына Сәүдә-сәнәгать палатасы Г.В.Плеханов исемендәге Россия Икътисад университетының «Кеше ресурслары белән идарә итү» кафедрасы доценты Людмила Иванова-Швец сөйләде. РИА Новости шул хакта яза.

Татарстан Рәисе Рөстәм Миңнеханов «Иннопром. Үзәк Азия» халыкара сәнәгать күргәзмәсенең пленар сессиясендә катнашты. Үзбәкстан башкаласына 700дән артык компания җыелды. Күргәзмәгә хакимият органнары җитәкчеләре, зур бизнесменнар, инженерлар, технологлар һәм IT-белгечләр кушылды. Бу хакта республика җитәкчесенең матбугат хезмәте хәбәр итә.

Казанда чираттагы температура рекорды куелды. Кичә, 24 апрельдә, Татарстан башкаласында һава температурасы +22,8 градуска кадәр җитте. Соңгы тапкыр мондый югары температура 50 ел элек диярлек, 1975 елда теркәлгән иде. Бу хакта Татарстан Гидрометеорология һәм әйләнә-тирә мохитне күзәтү үзәге хәбәр итә.

Татарстан Рәисе Рөстәм Миңнеханов «Иннопром» мәйданчыгында Үзбәкстанның Ташкент өлкәсе хакиме Зоир Мирзаев белән очрашты. Алар хезмәттәшлек юнәлешләре турында фикер алышты. Бу хакта Татарстан Рәисенең матбугат хезмәте хәбәр итә.

Мәскәүнең Татар мәдәни үзәгендә «Диләфрүз театры» музыкаль номерлар белән беррәттән тамашачылар игътибарына Туфан Миңнуллинның «Саташу» пьесасы буенча куелган спектакльдән өзек тәкъдим итте.

Татарстанның атказанган мәдәният хезмәткәре исемен тагын өч кеше алды. Бу хактагы карарны Татарстан Рәисе Рөстәм Миңнеханов имзаланган. Ул кичә хокукый мәгълүмат порталында чыкты.

29 апрельдә Башкортстанның Октябрьский шәһәре Нарыш бистәсе мәчетендә «Башкортстан Республикасы авыл җирлегендә мөселман мәхәлләсе үсеше: тарихы, гореф-гадәтләре һәм киләчәге» темасына I төбәкара Исмәгыйль хәзрәт Сәлимшин (1893-1975) укулары оештырыла. Җыен 1950-1970 елларда Нарыш бистәсендә имамлык иткән Исмәгыйль хәзрәт Сәлимшиннең тууына 130 ел тулуга багышлана. Бу турыда оештыручылар хәбәр итте.

Татарстан Рәисе Рөстәм Миңнеханов Үзбәкстанда «Иннопром. Үзәк Азия» Халыкара сәнәгать күргәзмәсендә катнаша. Бу хакта аның матбугат хезмәте хәбәр итә.

Ленин исемендәге мәдәният сараенда 2нче татар гимназиясенең традицион театр фестиваленә йомгак ясалды.

Төмәннең «Яңарыш» газетасында Ләйлә Мадъярованың «Йөрәгемне балаларга бирәм» номинациясендә җиңүче билгеләнде» дигән язмасы чыкты.

Казанның «Сәйдәш» мәдәният үзәгендә «Сөембикә» хатын-кызлар журналының 110 еллык юбилеена багышланган кичә узды. Чарада III Бөтендөнья татар хатын-кызлары съезды делегатлары катнашты.

Түбән Камада эрбет агачлары утырту буенча акция узды, анда 200гә якын кеше катнашты. Акциядә Түбән Кама мэры Рамил Муллин, шәһәр Башкарма комитеты җитәкчесе Камил Нәҗмиев, СИБУР хезмәткәрләре, «Түбән Кама Нефтехим» Иҗтимагый советы әгъзалары, «Лесные братья» мәктәп урманчылыгы укучылары, инклюзив берләшмә вәкилләре, шулай ук түбәнкамалылар катнашты. «Гаилә» паркында барлыгы 800 эрбет агачы утыртылды. Бу хакта Түбән Кама муниципаль районы рәсми сайтында хәбәр ителә.

24-29 апрельдә Педагоглар һәм остазлар елы кысаларында Әлмәт районында яшь геологларның IX республика ачык кыр олимпиадасы уза. Бу хакта «Әлмәт таңнары» сайтында хәбәр ителә.