Новости за 20.03.2017

რუსთავი 2-ზე კვლავ მეგა-შოუს დრო დადგა - სულ მალე X ფაქტორის მეოთხე სეზონი დაიწყება. წლევანდელ მეგაშოუსაც 4 კაციანი ჟიური ეყოლება.

79 წლის ასაკში პირველი ქართველი შოუმენი და მუსიკოსი გია ჭირაქაძე გარდაიცვალა. ანსამბლ ქართული ხმების ერთ-ერთ დამფუძნებელს საზოგადოების დიდი სიყვარულის გარდა სიცოცხლეშივე მრავალი ჯილდო მიენიჭა - იყო დამსახურებული სახალხო არტისტი, სახელმწიფო პრემიის ლაურეატი, ღირსების ორდენის კავალერი და საპატიო თბილისელი.

შეერთებული შტატების კონგრესში 2016 წლის საპრეზიდენტო არჩევნებში რუსეთის ჩარევის საკითხზე მოსმენა მიმდინარეობს. წარმომადგენელთა პალატის დაზვერვის კომიტეტში კონგრესმენთა შეკითხვებს ფედერალური საგამოძიებო ბიუროსა და ეროვნული უსაფრთხოების სააგენტოს ხელმძღვანელები პასუხობენ.

რუსთავი 2 ფართომასშტაბიან საინფორმაციო პროექტს უერთდება. გადაცემა სხვა შუადღე რუსულ მითების გაქარწყლებას ამჯერად სპეციალურ რუბრიკით შეეცდება და მორიგ ჯერზე შეახსენებს მაყურებელს, რა სარგებელი მოაქვს რეალურად ევროპას და მის ღირებულებებს. ინტენსიურ საინფორმაციო კამპანიას არასამთავრობო ორგანიზაცია ინტეგრაცია- გზა ნატოსა და ევროკავშირისკენ ჩაატარებს. ანტიდასავლურ დეზინფორმაციაზე მომზადდება სოციალური კლიპებიც, რომელიც რუსთავი 2-ის ეთერით გავა.

მოსკოვის აგრესიული პოლიტიკა მმართველი გუნდისგან განსხვავებით პრიორიტეტულია ოპოზიციისთვის. რუსული ოკუპაციის გასაპროტესტებლად ნაციონალური მოძრაობა ყველა ოპოზიციურ პარტიას მოუწოდებს ერთობლივი განცხადება მიიღონ.

მესამე სექტორის შემდეგ საკონსტიტუციო კომისიის დატოვებას პარტიების ნაწილიც არ გამორიცხავს. ოპოზიცია მმართველ გუნდს დამოუკიდებელი ინსტიტუტების დისკრედიტაციაში ადანაშაულებს.

მთავარი პროკურორი საიდუმლო შეტყობინებების ადრესატობას უარყოფს. საიდუმლო შეტყობინებებს საპარლამენტო უმრავლესობა, აღმასრულებელი ხელისუფლება, ძალოვანი უწყებები და ბიძინა ივანიშვილის უახლოესი გარემოცვა იღებს. დირექტივების მიმღებებს შორის კი ე.წ. დეპოლიტიზირებული პროკურატურაც და ამ უწყების პირველი პირიც ფიგურირებს.

არასამთავრომო სექტორის კიდევ ერთი დასკვნა მოსამართლე ნაზღაიძის მილიონიან ქონებას უკავშირდება. დოკუმენტაციის შესწავლის შემდეგ ახალგაზრდა იურისტთა ასოციაცია პროკურატურას მოუწოდებს დაინტერესდეს ამ საქმით.

არასამთავრობო ორგანიზაციებს აინტერესებთ, როდის შეიკრიბა დიდი პალატა, რომელმაც რუსთავი 2-ის საქმე განიხილა. ნინო გვენეტაძის უწყება ირწმუნება, რომ პალატა 1-ელ დეკემბერს დააკომპლექტა, თუმცა ამის შესახებ არავინ არაფერი იცოდა. უფრო მეტიც, მთელი სამი თვის განმავლობაში უზენაესი სასამართლოდან პასუხი მხოლოდ ერთი იყო - პალატის შემადგენლობა ჯერ ცნობილი არ არის.

ნარკოტიკული საშუალების შეძენა-შენახვის ბრალდებით ხმაურიან დაკავებებს შინაგან საქმეთა მინისტრი დღეს პირველად გამოეხმაურა. გიორგი მღებრიშვილი აცხადებს, რომ ყველა, ვინც ხმამაღლა პოლიციის მხრიდან უფლებების გადამეტებასა და საქმეში მტკიცებულებად წამლის ან იარაღის ჩადებაზე საუბრობს, ცრუობს.

"თავისუფალი ქვეყანა ვერ შედგება, თუ ნებისმიერი მოქალაქე არ იბრძოლებს თავისი და თავისი ახლობლების უფლებებისათვის" - ასე გამოეხმაურა დღეს საქართველოს პრეზიდენტი შვილის იმ საჯარო პროტესტს, რომელიც მეგობრის დაკავებას მოჰყვა. ანა მარგველაშვილი ამ ფაქტს უშუალოდ პრეზიდენტის ოჯახის წინააღმდეგ მიმდინარე პოლიტიკურ ბრძოლას უკავშირებს. მიხელ თათარიშვილის დაკავება სურამში მდებარე ერთ-ერთ რესტორანში უამრავი თვითმხილველის თანდასწრებით მოხდა, თუმცა დღეს რესტორნის თანამშრომლები უკვე კამერებს გაურბიან.

ე.წ. მოსმენების კანონს პრეზიდენტმა ბოლო 3 წლის განმავლობაში ვეტო უკვე მესამედ დაადო. მოტივირებული შენიშვნებით კანონპროექტის ამ ვერსიის უკან დაბრუნება გიორგი მარგველაშვილმა 2 ხარვეზით ახსნა. ქვეყნის პირველი პირი მიიჩნევს, რომ ახალი სააგენტო სახელმწიფო უსაფრთხოების სამსახურისგან დამოუკიდებელი ვერ იქნება და შესაბამისად, საკონსტიტუციო სასამართლოს მოთხოვნა არ სრულდება. მეორე შენიშვნა ბაზარზე მოქმედი სატელეკომუნიკაციო კომპანიებისთვის ფინანსური პრობლემებს შექმნას უკავშირდება.

ადმინისტრაციული სამართალდარღვევის ფაქტზე ბათუმის საქალაქო სასამართლომ დღეს კიდევ 3 პირის საქმე განიხილა. ბათუმის მოვლენებთან დაკავშირებით გიორგი წოწორიას, მანუჩარ მამულაძეს და ზაზა ბოლქვაძეს სამართალდამცავები წვრილმან ხულიგნობას და პოლიციელებისადმი დაუმორჩილებლობას ედავებიან. მოსამართლე ინდირა შაშანეიშვილის გადაწყვეტილებით 2 მათგანს 250 ლარიანი, ხოლო ერთს 100 ლარიანი ჯარიმის გადახდა დაეკისრა ბიუჯეტის სასარგებლოდ.

გადახდილი სახურავები და მოგლეჯილი ხეები - ძლიერმა ქარმა ქალაქ რუსთავში პრობლემები შექმნა. 

დედაქალაქის მერია მუშაობის საგანგებო რეჟიმზე გადავიდა. შესაბამისი სამსახურები ძლიერი ქარის გამო სხვადასხვა უბნებში შექმნილ პრობლემებზე მუშაობენ. მერიამ საგანგებო განცხადებაც გაავრცელა, რომელსაც უცვლელად გთავაზობთ:

საკრებულოს წევრი ალეკო ელისაშვილი საქალაქო სასამართლოს გადაწვეტილების გასაჩივრებას სააპელაციოში გეგმავს. საქალაქო სასამართლომ ეკა ბესელიას სარჩელი ალეკო ელისაშვილის წინააღმდეგ ნაწილობრივ დააკმაყოფილა.

ირანში ახალ წელს ზეიმობენ - სპეციალურად ამ დღისთვის საქართველოში ჩამოსული ირანელები ფილარმონიის წინ შეიკრიბნენ და ტრადიციული დღესასწაული აღნიშნეს. სადღესასწაულო ღონისძიებები მთელი კვირის განმავლობაში გაგრძელდება.

თბილისის საკრებულოს წევრი, საბურთალოს მაჟორიტარი დეპუტატი ალეკო ელისაშვილი თბილსის მერიას კორუფციულ გარიგებაში კიდევ ერთხელ ადანაშაულებს.

თბილისის საკრებულოს ფრაქცია ერთიანი ნაციონალური მოძრაობის თავმჯდომარე, ირაკლი ნადირაძე, რუსთავი 2-ის საქმის ერთ-ერთი მოსამართლის, ნატა ნაზღაიძის ძმისთვის გადაცემული ქონების თაობაზე პრეზენტაცია კურიერის პირდაპირ ეთერში შეაფასა.

ფრაქცია მოძრაობა თავისუფლებისთვის - თბილისის წევრი თამაზ შოშიაშვილი ნაზღაიძის საქმესთან დაკავშირებით, კურიერის პირდაპირ ეთერში ამბობს, რომ "შორს არის იმ აზრისგან, რომ დავით ნარმანიამ თვითონ გადაწყვიტა, ასეთ გარიგებაში შესულიყო.“

საქართველოს ახალგაზრდა იურისტთა ასოციაციის პროექტის კოორდინატორი სულხან სალაძე მუნიციპალიტეტის საჯარო მოხელეების მხრიდან შესაძლოა დანაშაულის ნიშნებზე საუბრობს.

თავისუფალი დემოკრატების პოლიტიკური მდივანი, ნინო გოგუაძე უზენაესი სასამართლოს დიდი პალატის დაკომპლექტების საკითხზე კურიერის პირდაპირ ეთერში საუბრობს. იგი აცხადებს, რომ რუსთავი 2 -ის საქმის განმხილველი მოსამართლეების სიას საზოგადოება ძალიან დიდი ინტერესით ელოდებოდა, თუმცა ის 27 თებერვლამდე უცნობი იყო.

„მე უშუალოდ ვმონაწილეობდი ასეთი მესიჯბოქსების შედგენაში,“ - ეს განცხადება თავისუფალი დემოკრატების პოლიტიკურმა მდივანმა, ნინო გოგუაძემ, კურიერის პირდაპირ ეთერში გააკეთა.

არასამთავრობო ორგანიზაცია საერთაშორისო გამჭვირვალობა - საქართველოს ანალიტიკოსი გიორგი ბერაია უზენაესი სასამართლოს ვებ-გვერდზე გავრცელებულ ინფორმაციაზე საუბრობს, რომლის მიხედვითაც, უზენაეს სასამართლოს დიდი პალატის 9 კაციანი შემადგენლობა 1-ელ დეკემბერს დაუკომპლექტებია. ბერაია ამბობს, რომ უზენაესმა სასამართლომ ამ საკითხზე განმარტება უნდა გააკეთოს.

საქართველოს პრეზიდენტის ადმინისტრაციის უფროსი გიორგი აბაშიშვილი პრეზიდენტის მიერ ე.წ. მოსმენების კანონზე ვეტოს დადების შესახებ საუბრობს. პრეზიდენტის ადმინისტრაციის უფროსი უმრავლესობასთან დიალოგის ინიციატივით გამოდის.