Новости за 15.03.2017

მძიმე ფინანსური კრიზისის მიუხედავად, ბრაზილიაში მოდის კვირეული მაინც გაიხსნა. რეცესიის ფონზე სან პაულოს ფეშენ ვიქის ორგანიზატორებს ღონისძიების მოწყობა მცირე ბიუჯეტით უხდებათ. კოლექციების ჩვენება ტრადიციული წვეულებების გარეშე და ახალი ლოზუნგით - "ნახე და ახლავე იყიდე", იმართება.

ასწლოვანი ხეების გადატანის პროცესი აუცილებლად გამოიწვევს უკვე გამოვლენილი და ჯერ კიდევ აღმოსაჩენი არქეოლოგიური ძეგლების განადგურებას - ივანიშვილის დენდროლოგიურ გატაცებას ახლა უკვე არქეოლოგებიც ეხმაურებიან. საუბარია ბობოყვათის რეზიდენციაზე, სადაც ხეებს ზუსტად იქ თხრიან, სადაც ანტიკური სასახლეა აღმოჩენილი.

პროგრამა, რომელიც კრიტიკის მიზეზი გახდა - პროტესტი ჯანდაცვის სამინისტროს გადაწყვეტილებამ გამოიწვია. მეტადონის პროგრამაში ჩართული ერთადერთი კლინიკა ბენეფიციარებს ვეღარ მოემსახურება და სერვისი სახელმწიფოს დაქვემდებარებულ ცენტრში გადავა. ფსიქიკური ჯანმრთელობისა და ნარკომანიის პრევენციის ცენტრის გადაწყვეტილების საფუძველზე კომპანია ურანტს ხელშეკრულება შეუწყდა. 

არასამთავრობო ორგანიზაციები თბილისის საკრებულოს აუტიზმის სპექტრის მქონე ბავშვების დისკრიმინაციაში ადანაშაულებენ. საკრებულოს მიერ მიღებულ დადგენილებაზე პასუხისმგებლობას არ იღებს მერია, თუმცა აუტიზმის მქონე ბავშვების ოჯახები სწორედ დედაქალაქის მერისგან ითხოვენ რეაბილიტაციის პროგრამაში ჩართვას.

პრემიერმინისტრის მხრიდან გამოთქმულ იმ ბრალდებებს, სადაც ის ბათუმში მომხდარი არეულობის ორგანიზატორებად ნაციონალური მოძრაობის ზოგიერთ წევრზე მითითებს, უპასუხეს ნაციონალური მოძრაობაში.

არასამთავრობო ორგანიზაციები საკონსტიტუციო კომისიას იმ შემთხვევაში დატოვებენ, თუ მმართველი გუნდი მათ წინადადებებს ცვლილებების პაკეტში არ გაითვალისწინებს. ცვლილებები საარჩევნო სისტემას ეხება. სამოქალაქო საზოგადოების წარმომადგენლებს მიაჩნიათ, რომ მაჟორიტარული სისტემა პროპორციულით უნდა ჩანაცვლდეს.

მოსკოვმა ოკუპირებული სამხრეთ ოსეთის ე.წ. სამხედრო ქვედანაყოფების რუსეთის არმიაში გაერთიანების პროცესი დაიწყო. შესაბამის განკურგელებას ხელს ვლადიმირ პუტინი აწერს. საოკუპაციო რეჟიმთან შეთანხმების გაფორმება რუსეთის თავდაცვის სამინიტროს დაევალა. რუსულ მედიაში კი უკვე ღიად საუბრობენ, რომ პუტინი იმ პროცესის დასრულებას გეგმავს, რომელიც ცხინვალის რიუსეთთან მიერთებას გულისხმობს.

საპატრულო პოლიციის უფროსმა პირველი სატელევიზიო კომენტარი გააკეთა ბათუმში მომხდარი არეულობის შემდეგ. კახა ბუხრაძე ამბობს, რომ ცნობილი დისკრიმინაციული ფრაზა ბათუმელების მისამართით მას არ უთქვამს.

პრემიერმინისტრმა ბათუმში მომხდარი არეულობის შესახებ ვრცელი კომენტარი გააკეთა და მან გამოძიების დეტალებზე ისაუბრა. მან აქციის ორგანიზატორად ნაციონალური მოძრაობის ზოგიერთი წარმომდგენელი დაასახელა.

განათლებისა და ეკონომიკის მინისტრების შემდეგ სტრასბურგის გადაწყვეტილება ევა გოცირიძემ შეაფასა. იუსტიციის უმაღლესი საბჭოს წევრი იმ საფრთხეებზე საუბრობს, რომელიც სტრასბურგის სასამართლომ შესაძლოა, საქართველოს მოუტანოს და ქიბარ ხალვაშს ღია მხარდაჭერას უცხადებს.

პოლიტიკურ ოპონენტებთან ანგარიშსწორების მიზნით, ნარკოპოლიტიკის ბერკეტის გამოყენებაზე საუბრობენ ოპოზიციაში. ნაციონალური მოძრაობის და ევროპული საქართველოს წევრები ძალოვანი უწყებებს პოლიტიკური შურისძიების პროცესში მონაწილეობის გამო აკრიტიკებენ.

პროკურატურის მოთხოვნა სასამართლომ დღეს სრულად გაიზიარა და ელისო კილაძის შვილს, რომელსაც გამოძიება დიდი რაოდენობით ნარკოტიკების შეძენა-შენახვას ედავება, 2-თვიანი წინასწარი პატიმრობა შეუფარდა. დაცვის მხარე დავით ხარშილაძის დაუყოვნებლივ გათავისუფლებას ითხოვდა.

„ძალიან მნიშვნელოვან და რთულ პროცესთან გვაქვს საქმე,“ - აცხადებს საქართველოს ატლანტიკური საბჭოს ვიცეპრეზიდენტი, ბათუ ქუთელია, რუსთავი2-ის საქმეზე სტრასბურგის გადაწყვეტილებასთან დაკავშირებით მმართველი გუნდის მიერ გაკეთებული განცხადებების შეფასებისას.

საქართველოს ახალგაზრდა იურისტთა ასოციაციის სტრატეგიული სამართალწარმოების პროექტის კოორდინატორი, თამარ აბაზაძე, კურიერის პირდაპირ ეთერში რუსთავი2-ის საქმეზე ევა გოცირიძის მიერ სტრასბურგის სასამართლოს კრიტიკას ეხმაურება.

საქართველოს ახალგაზრდა იურისტთა ასოციაციის სტრატეგიული სამართალწარმოების პროექტის კოორდინატორი, თამარ აბაზაძე, სტრასბურგის ადამიანის უფლებათა ევროპულ სასამართლოს თაობაზე მმართველი გუნდის მხრიდან გაკეთებულ განცხადებებს სამართლებრივად აფასებს. ის მათ შეფასებებს კატეგორიულად არ იზიარებს. მისი თქმით, სტრასბურგის სასამართლო მეოთხე ინსტანცია არ არის.

საერთაშორისო გამჭვირვალობა - საქართველოს ანალიტიკოსი, გიორგი ბერაია, მიიჩნევს, რომ რუსთავი2-ის საქმეზე ევროსასამართლოს გადაწყვეტილების არშესრულება დიდი დარტყმა იქნება ქვეყნის საგარეო კურსისთვის.

„ჩვენ ვნახეთ, რომ პოლიციის რეაგირება ამ ძალადობრივ ფაქტებზე იყო დაგვიანებული,“ - ეს განცხადება სახალხო დამცველმა კურიერის პირდაპირ ეთერში ბათუმში განვითარებული მოვლენების შესახებ საუბრისას გააკეთა.

რუსთავი2-ის საქმეზე ევა გოცირიძის მიერ სტრასბურგის სასამართლოს კრიტიკას კურიერის პირდაპირ ეთერში ზაზა ხატიაშვილი გამოეხმაურა. ადვოკატთა ასოციაციის თავმჯდომარემ იუსტიციის უმაღლესი საბჭოს წევრის წერილს "აბსურდული" უწოდა.

„მე ვფიქრობ, რომ გადაწყვეტილება, რომელიც გამოაქვს ევროპის სასამართლოს, არის საბოლოო,“ - განაცხადა საქართველოს სახალხო დამცველმა, უჩა ნანუაშვილმა, რუსთავი2-ის საქმეზე საუბრისას.

ელისო კილაძის შვილის დაკავებასთან დაკავშირებით, უჩა ნანუაშვილმა კურიერის პირდაპირ ეთერში იმედი გამოთქვა, რომ „წინადადება იქნება სათანადოდ რეაგირებული და კონკრეტული პოლიციელი იქნება პასუხისგებაში მიცემული“.

ჟურნალისტ ელისო კილაძის შვილი, დავით ხარშილაძე, პროტესტის ნიშნად შიმშილობას აცხადებს. ის სამართალდამცველებმა 2 დღის წინ დიდი რაოდენობით ნარკოტიკული საშუალების შეძენა-შენახვის ბრალდებით დააკავეს. ხარშილაძე ბრალს არ აღიარებს და სასამართლოს მისი საქმის დაჩქარებული წესით განხილვას, თავისი ჯანმრთელობის მდგომარეობიდან გამომდინარე სთხოვს.

ბათუმის საქალაქო სასამართლომ ნარიმან ლომინაძე გაამართლა. ბათუმში მომხდარ არეულობასთან დაკავშირებით სასამართლო პროცესი დღესაც გაიმართა.

„ჩემი შვილი დანაშაულს არ აღიარებს, ჩაუდეს ზუსტად იმ რაოდენობის ნარკოტიკი, რომ ძალიან მძიმე სასჯელი მიიღოს,“ - აცხადებს გაზეთ ქრონიკა პლიუსის მთავარი რედაქტორი.

მერაბ ღოღობერიძე აჭარის საპატრულო პოლიციის უფროსის გადადგომას ისევ ითხოვს. ის კახა ბუხრაძის გადადგომის მოთხოვნით აქციების გამართვასაც არ გამორიცხავს.

საქართველოს ეროვნულმა ბანკმა ვალუტის ახალი გაცვლითი კურსი გამოაქვეყნა. ოფიციალური მონაცემებით, 1 ამერიკული დოლარი 2.4910 ლარს უტოლდება. დღეს მოქმედი კურსით, 1 აშშ დოლარი 2.4854 ლარი ღირდა, რაც იმას ნიშნავს, რომ ეროვნული ვალუტა 0,0056 პუნქტით გაუფასურდა.