Новости за 11.02.2017

საქართველოს პრეზიდენტის თანაშემწე უშიშროების საკითხებში, ეროვნული უშიშროების საბჭოს მდივანი, დავით რაქვიაშვილი, პრეზიდენტის მიერ პარლამენტს პრეზიდენტის მიერ გაგზავნილ უსაფრთხოების პრინციპით შემუშავებული წინადადებების დაწუნებისთვის აკრიტიკებს.

„მე სუს-ის, როგორც ინსტიტუციის მიმართ, ნდობა მექნება იმ შემთხვევაშიც, თუკი ვიქნები ოპოზიციაში,“ - ასე შეაფასა პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის პირველი მოადგილემ, გედევან ფოფხაძემ, ოპოზიციის კრიტიკა სუს-ში ე.წ. მოსმენების გასაღების დატოვებაზე.

„ვხედავთ, რომ ვიღებთ მონსტრს, თავისი აწყობილი სისტემით, რომლის მიზანია, გააკონტროლოს ნებისმიერი ჩვენი მოქალაქე,“ - ასე შეაფასა საერთაშორისო გამჭვირვალობა-საქართველოს აღმასრულებელმა დირექტორმა ე.წ. ფარული მიყურადების შესახებ კანონპროექტი.

პარლამენტის ფრაქციის ევროპული საქართველო - უკეთესი მომავლისთვის წევრი, გიორგი ტუღუში, სუს-ში ე.წ. მოსმენების გასაღების დატოვებას აკრიტიკებს. მისი თქმით, მმართველი გუნდის მიერ წარმოდგენილი კანონპროექტი რეალურად არაფერს ცვლის.

„მომწონს რუსთავი2-ის პოზიცია, როცა ცდილობს, რომ გააშარჟოს ფარული მოსმენების საკითხი, რადგან ჩვენ მხოლოდ ჩვენი რესურსებით თუ დავიცავთ საკუთარ პირად ცხოვრებას, რადგან ხელისუფლება არათუ გვიცავს ფარული ჩანაწერების განხორციელებისგან, შანტაჟისგან, არამედ იფართოებს ამ შესაძლებლობას. ამიტომ მინდა, მაყურებელს მივმართო, ერთადერთი გზა იმისა, რომ ჩვენი პირადი ცხოვრების ხელყოფა არ მოხდეს, არის ის, რომ დავცინოთ ამ ყველაფერს,“ - ეს განცხადება თამარ კორძაიამ შაბათის კურიერის პირდაპირ ეთერში გააკეთა.

რუსთავი2-მა მიმოწერის ხელოვნურად შექმნის ჩვენების შემდეგ ახალი ექსპერიმენტი ჩაატარა. გენერალური დირექტორის, ნიკა გვარამიას და ყოფილი პრემიერმინისტრის, ბიძინა ივანიშვილის, რეალურად არარსებული სატელეფონო საუბარი დაამონტაჟა. ამით გიჩვენათ, თუ რა მარტივია სატელეფონო საუბრის ხელოვნურად შექმნა. 

მმართველ გუნდსა და ოპოზიციას შორის დაძაბული დებატები და ურთიერთბრალდებები ე.წ. ფარული მოსმენების კანონპროექტის განხილვას მოჰყვა. მოქმედი რედაქციით, ახალი ორგანო, რომლის ხელშიც ე.წ. მოსმენების გასაღები იქნება, სუს-ში სსიპ-ის სახით იფუნქციონირებს.  

რუსთავი2-ის იურისტები უზენაესი სასამართლოს მხრიდან კანონით დადგენილი ვადის დარღვევაზე საუბრობენ. მათი თქმით, რუსთავი2-ის სახელით შეტანილი ბოლო საკასაციო საჩივრის წარმოებაში მიღების შემდეგ, უზენაესმა სასამართლომ კანონით დადგენილი ვადა უკვე დაარღვია.

საქართველოს რესპუბლიკური პარტიის თავმჯდომარის, ხათუნა სამნიძის, თქმით, რამდენიმე პარტიასა და დამოუკიდებელ დეპუტატებთან ერთად 23 დეკემბერს მიღებულ განკარგულებას თბილისის საკრებულოში ასაჩივრებენ. ამ განკარგულების მიხედვით, რუსთავი2-ის საქმის განმხილველი მოსამართლის ოჯახს 1 მლნ ლარი და მიწის ნაკვეთი გადაეცა.  

„გვაქვს იმედი, რომ მოსამართლეები არ აჰყვებიან ხელისუფლების პოლიტიკური ვენდეტის და რუსთავი2-ის მითვისების კამპანიას. თუ საწინააღმდეგო გადაწყვეტილებას მიიღებენ, საკოორდინაციო საბჭო გადაწყვეტს, რა ნაბიჯები გადაიდგას. ყოველ შემთხვევაში, საპროტესტო აქციები გაგრძელდება,“ - ასე შეაფასა რუსთავი2-ის საქმე ნაციონალური მოძრაობის პოლიტსაბჭოს წევრმა, გრიგოლ ვაშაძემ. 

თბილისის საკრებულოს ფრაქცია თბილისის წევრი, თამაზ შოშიაშვილი, თბილისის მერიას რუსთავი2-ის საქმის განმხილველი მოსამართლის ოჯახთან კორუფციულ გარიგებაში ადანაშაულებს.

"იმდენად თეთრი ძაფით არის ყველაფერი ნაკერი, მიმაჩნია, რომ საკრებულო არ დაუჭერს მხარს იმ გადაწყვეტილების დატოვებას და იმ განკარგულებას გააუქმებს, რომელიც მათ მიიღეს,“ - ასე გამოეხმაურა თბილისის საკრებულოს ფრაქცია დედაქალაქის თავმჯდომარე, ზაზა ვეკუა, მოსამართლის, ნატა ნაზღაიძის, ოჯახისთვის მილიონის გადახდის საქმეს.

„დანაშული ექსპერტიზის ბიუროს კი არ მიუძღვის, დანაშაული მიუძღვის თბილისის მერიას,“ - ასე უპასუხა თბილისის საკრებულოს ფრაქცია ნაციონალური მოძრაობის წევრმა, მარინა დათუკიშვილმა, დედაქალაქის მერის მოადგილეს, ირაკლი ლექვინაძეს, რომლის თქმითაც, მერია მოსამართლე ნატა ნაზღაიძის ოჯახისთვის გადაცემული მიწის ნაკვეთის შეფასებისას დარღვევა არ ყოფილა, რადგან მერია სამხარაულის სახელობის ექსპერტიზის ეროვნული ბიუროს დასკვნას ეყრდნობოდა.

რუსთავი2-ის საქმის განმხილველი მოსამართლის ძმისთვის, ზვიად ნაზღაიძისთვის, მერიის მიერ გადაცემული მიწის პირველადი შეფასებისას დადგენილ ფასსა და რეალურ საბაზრო ღირებულებას შორის სხვაობა, როგორც გაირკვა, მილიონებია.

როგორ მუშაობენ ჩინოვნიკები - სახელმწიფო აუდიტმა ეს ბათუმის მერიის მაგალითზე შეამოწმა და გაირკვა, რომ 2015 წელს მისი დაფინანსება წინა წელთან შედარებით, თითქმის, 28%-ით, 2013 წელთან შედარებით კი 54%-ით არის გაზრდილი.

ფარული მოსმენა-მიყურადების ახალი კანონპროექტის არსებული ფორმით მიღებას მობილური ოპერატორები, მაგთი, ბილაინი და ჯეოსელი, კატეგორიულად ეწინააღმდეგებიან.  

ე.წ. საზღვართან მდებარე სოფელ კირბალის ​მაცხოვრებლები ყვებიან, რომ შეშა მათთვის გათბობის ყველაზე იაფი საშუალებაა, თუმცა ისინი შესაძლოა რუსმა ოკუპანტებმა დააკავონ და ცხინვალის წინასწარი დაკავების იზოლატორში გადაიყვანონ. სოფელთან არ დგას პოლიცია, რომელიც მაცხოვრებლებს საფრთხის შესახებ გააფრთხილებს.

რუსეთი ცდილობს, საქართველოს ოკუპირებულ ტერიტორიებზე მცხოვრებ მოქალაქეებს უკვე სპორტის საშუალებით დაარწმუნონ, რომ სხვადასხვა საერთაშორისო ფედერაციის აღიარებას მოიპოვებენ. ფეხბურთი, ჭადრაკი და ახლა უკვე ჭიდაობაც, სპორტის სახეობათა ის არასრული ჩამონათვალია, რომლის წარმომადგენლებსაც რუსეთის ამავე სახეობების ფედერაციების უმაღლესი პირები სტუმრობდნენ.

რუსთავი 2-ის გენერალური დირექტორი ნიკა გვარამია განმარტავს, რისთვის დასჭირდა ახალი ექსპერიმენტის ჩატარება, სადაც ის, თითქოსდა, ბიძინა ივანიშვილს ტელეფონზე ესაუბრება. 

გადაუღებელ წვიმებს კალიფორნიის ჩრდილოეთ რეგიონებში მასშტაბური წყალდიდობა მოჰყვა. სტიქიამ ყველაზე მეტად ქალაქ საკრამენტოს მიმდებარე დასახლებები დააზარალა.

ბაღდადის ცენტრში ათასობით ადამიანი ქუჩაში გამოვიდა. მომიტინგეები რეფორმების გატარებას მოითხოვდნენ და 2017 წელს დანიშნული ადგილობრივი არჩევნების გადადების ინიციატივას აპროტესტებდნენ.

თბილისის ჰამქარი 10 წლისაა. ამ დღესთან დაკავშირებით არასამთავრობო ორგანიზაციამ დედაქალაქზე მზრუნველი საუკეთესო მოქალაქეები გამოავლინა. სპეციალური პრიზი მედიამხარდაჭერისთვის სამაუწყებლო კომპანია რუსთავი2-საც გადმოეცა.

დაჯგუფება ისლამური სახელმწიფოს მებრძოლებმა სირიის ქალაქ ელ ბაბში 40 მშვიდობიანი მოქალაქე მოკლეს.

თეირანი რუსეთის საჰაერო ძალებისთვის საჰაერო სივრცის გახსნაზე მსჯელობს. ინიციატივას ქვეყნის ხელისუფლება სირიაში ტერორიზმთან ბრძოლის პროგრამის ფარგლებში განიხილავს.

ოლიმპიური კომიტეტის პრეზიდენტობის ყოფილი კანდიდატი, ირაკლი მეძმარიაშვილი, ჟურნალისტებს არაოფიციალურ გარემოში შეხვდა და სამომავლო გეგმები გააცნო.