Новости за 12.03.2016

პედაგოგთა ბოლო საგნობრივმა გამოცდამ მასწავლებელთა კომპეტენციის დაბალი დონე აჩვენა. ამის მიზეზად არასამთავრობო ორგანიზაცია საგანმანათლებლო ალიანსის თანათავმჯდომარე მარიამ რამინაშვილი განათლების სამინისტროს მხრიდან პროცესში არსებულ ხარვეზებზე საუბრობს და მთავარ მიზეზად პედაგოგების ტრენინგების გადამზადების გვიან გამოცხადებას ასახელებს, რის გამოც პედაგოგებმა ვერ მოახერხეს სათანადო მომზადება.

თბილისის სახელმწიფო უნივერსიტეტის თვითმმართველობის ვიცე-პრეზიდენტმა პაატა ბახტურიძემ განაცხადა, რომ დაუშვებელია საგანმანათლებლო დაწესებულებაში ე.წ. ოდეერის არსებობა.

სახელმწიფო უნივერსიტეტის რექტორი ლადო პაპავა მის წინააღმდეგ არსებულ ბრალდებებს არ იზიარებს და არსებულ დაპირისპირებაში პირადი ინტერესების არსებობას კატეგორიულად გამორიცხავს. ამის შესახებ ლადო პაპავამ კურიერის პირდაპირ ეთერში განაცხადა და თქვა, რომ კანცლერის კნადიდატურობიდან გიორგი გაფრინდაშვილმა საკუთარი კანდიდატურა თუ არ მოხსნა, მის შესახებ სენატმა უნდა იმსჯელოს და მიიღოს გადაწყვეტილება.

თბილისის სახელმწიფო უნივერსიტეტის სტუდენტები ნიკა გვარამიასგან ბოდიშის  მოხდას ითხოვენ. ამის შესახებ ერთ-ერთმა სტუდენტმა გვანცა ხონელიძემ კურიერის პირდაპირ ეთერში ჩართვისას განაცხადა და თქვა, რომ უნივერსიტეტში საპროტესტო აქციებში მონაწილე სტუდენტები რუსთავი 2-ის გენერალური დირექტორისგან დღეს სოციალურ ქსელში დაფიქსირებული პოზიციის გამო ბოდიშის მოხდას საჯაროდ ითხოვენ.

სტუდენტების და განათლების მინისტრის თამარ სანიკიძის სტუდენტებთან შეხვედრა ცოტა ხნის წინ დასრულდა.

ნაციონალური მოძრაობის წევრი ზაზა ბიბილაშვილი ფარული ვიდეოჩანაწერების გავრცელებას დღევანდელი ხელისუფლების მართვის სტილს უწოდებს და ამბობს, რომ "დღეს ბიძინა ივანიშვილი საქართველოს რუსულ-ოლიგარქიული სტილით მართავს."

თავდაცვისა და უშიშროების კომიტეტის თავმჯდომარე, ირაკლი სესიაშვილი ფარული ვიდეოჩანაწერების გასაჯაროებას „ამაზრზენ ფაქტს" უწოდებს.

დღის ცენტრი თბილი კერა, სადაც 15 ბენეფიციარი თითქმის მთელ დღეს ატარებს, შესაძლოა ერთ თვეში დაიხუროს. სწორდ ეს დრო მისცეს შეზღუდული შესაძლებლობის მქონე ბავშვებსა და მათ პედაგოგებს იმ შენობიდან გასასვლელად, რომელშიც უკვე 3 წელია იმყოფებიან. სახლის მფლობელი მის გაყიდვას გეგმავს.

"ეს იყო ტერორისტული აქტი," - ასე შეაფასა თავისუფალი დემოკრატების წევრმა ნინო გოგუაძემ ფარული ჩანაწერების გავრცელების ფაქტი. ამის შესახებ დეპუტატმა განცხადება კურიერის პირდაპირ ეთერში გააკეთა.

არასამათავრობო ორგანიზაციები საპროტესტო აქციებისთვის ემზადებიან. გადაწყვეტილება მიღებულია, პირველი მშვიდობიანი აქცია მომავალ შაბათს გაიმართება. ამის შესახებ სამართლიანი არჩევნებისა და დემოკრატიის საერთაშორისო საზოგადოების კონსულტანტმა სამართლებრივ საკითხებში ნინო ლომჯარიამ კურიერის პირდაპირ ეთერში ისაუბრა.

ცვლილებების მოთხოვნის ახალი აქტიური ტალღა არასამთავრობო ორგანიზაციებმა გუშინ საღამოს, მას შემდეგ დაიწყეს, რაც სოციალური ქსელში კიდევ ერთი ფარული ჩანაწერი გავრცელდა.

თავისუფალი დემოკრატების ლიდერი ირაკლი ალასანია ფარული ჩანაწერების გავრცელების უკან ყოფილ პრემიერის ბიძინა ივანიშვილის ინტერესებს ასახელებს და ამბობს, რომ დღეს ქვეყნის არაფორმალური მმართველი უშიშროების სამსახურებს მართავს და მისი დავალებით ხდება „ამორალური და მზაკვრული“ გეგმების დავალებების გაცემა.

თავისუფალი დემოკრატების წევრი ირაკლი ალასანია გუშინ გავრცელებულ ფარულ ჩანაწერებთან დაკავშირებით პირველ კომენტარს აკეთებს და აცხადებს, რომ ეს იყო თავდასხმა მთლიანად სახელმწიფოზე.

პრემიერმინისტრი ფარული ვიდეოჩანაწერის გავრცელებას საგანგებო მიმართვით გამოეხმაურა და დამნაშავეების უმკაცრესად დასჯის პირობა დადო. დღეს გიორგი კვირიკაშვილი ქართული ოცნების ოფისში რამდენიმე საათის განმავლობაში იმყოფებოდა და იქ დახურულ შეხვედრებს მართავდა.

რუსული სამშენებლო ტექნიკა გორის რაიონში სოფელ ჯარიაშენში გამოჩნდა. გავრცელებული ინფორმაციით, მათ ოკუპირებულ ტერიტორიაზე გზა გაყავთ. როგორც კურიერისთვის გახდა ცნობილი, ახალი გზის მშენებლობა უკვე სამი დღეა მიმდინარეობს და ის ადგილობრივების ბაღებსა და სახნავ-სათეს მიწებზე გადის, რომელიც სოფელ ჯარიაშენის მცხოვრებლებმა 2 წლის წინ მცოცავი ოკუპაციის დროს დაკარგეს.

მხოლოდ ერთი წლის განმავლობაში საქართველოს ბიუჯეტიდან ე.წ. ოდეერების ხელფასებისთვის 4 მილიონ ლარზე მეტი დაიხარჯა. ინფორმაციის დამადასტურებელი დოკუმენტები დღეს საქართველოს განვითარების ფონდის ერთ-ერთმა ლიდერმა გაასაჯაროვა. ირაკლი ყიფიანის განცხადებით დოკუმენტების მიხედვით დასტურდება, რომ თითქმის ყველა სახელმწიფო უწყებაში უშიშროების ოფიცრები ოფიციალურად იყვნენ დასაქმებულები.

პირადი ცხოვრების ამსახველი კადრების გავრცელებას მესამე სექტორი მსვლელობით გააპროტესტებს. გადაწყვეტილება კოალიციამ ეს შენ გეხება დღეს გამართულ შეხვედრაზე მიიღო.

თბილისის სახელმწიფო უნივერსიტეტის სტუდენტები ორშაბათამდე ისევ სხდომათა დარბაზთან რჩებიან და აუდიტორიის ბლოკირებას განაგრძობენ.

პაატა ბურჭულაძის საქართველოს განვითარების ფონდი სოციალურ აქციას ნუ გაისუსები იწყებს. ამ სახელწოდებით აქცია მთავრობის კანცელარიასთან გაიმართა.

ამ წუთებში პროკურატურაში ჟურნალისტები მაკა რაზმაძე და ნინო ჯღარკავა გამომძიებლებს ესაუბრებიან. სამართალდამცავ უწყებაში ისინი მას შემდეგ დაიბარეს, რაც ჟურნალისტებმა სოციალური ქსელით გაავრცელეს ინფორმაცია იმის შესახებ, რომ ყალბი სახელითა და გვარით უცნობმა პირმა მათ ფეისბუკის პირად მიმოწერაში ბმული მიაწოდა, რომელზეც ერთ-ერთი პოლიტიკოსის პირადი ცხოვრების ამსახველი ვიდეომასალა იყო განთავსებული. 

ქართული ოცნების ოფისში პრემიერმინისტრი გიორგი კვირიკაშვილი დახურულ შეხვედრას მართავს. ზუსტი ინფორმაცია თუ ვის ხვდება მთავრობის მეთაური უცნობია. როგორც რუსთავი 2-თან საუბრისას კვირიკაშვილის პრესსამსახურმა განაცხადა ეს არ არის პოლიტსაბჭოს სხდომა. ასევე ცნობილი ხდება, რომ მსგავსი შეხვედრები ყოველ შაბათს გაიმართება. 

ამ წუთებში ქართული ონცების ოფისში პრემიერმინისტრს ელოდებიან, სადაც სავარაუდოდ პოლიტსაბჭოს სხდომა გაიმართება. 

ძაღლების საერთაშორისო გამოფენა იმართება თბილისში. სხვადასხვა ჯიშის წარმომადგენლებს ბრიუსელიდან მოწვეული სერტიფიცირებული მსაჯები შეაფასებენ.

”მე არ გადავკვეთე საზღვარი, საზღვარმა გადამკვეთა მე” ამ სახელწოდების მქონე თომა ჩაგელიშვილის დოკუმენტური ფილმი პრაღის კინოფესტივალის მონაწილეა.

თბილისის სახელმწიფო უნივერსიტეტის სტუდენტები სამოქმედო გეგმაზე მუშაობენ - ამ წუთებში კანცლერობის კანდიდატის მოწინააღმდეგე ახალგაზრდები საკოორდინაციო შეხვედრას მართავენ.