Новости за 16.01.2016

სამეგრელო-ზემო სვანეთის პროკურორის ვახტანგ ქირიას ცხედარი პროზექტურაში გადაასვენეს. ადგილზე სადაც პროკურორი მოკლული იპოვეს შინაგან საქმეთა მინისტრი გიორგი მღებრიშვილი, მთავარი პროკურორი ირაკლი შოთაძე და პროკურორის ოჯახის წევრები იმყოფებოდნენ.

ნაციონალური მოძრაობის წევრი დეპუტატი პეტრე ცისკარიშვილი გაზპრომთან მიმდინარე მოლაპარაკებების გამო ხელისუფლებას აკრიტიკებს და არ გამორიცხავს, რომ ამ მოლაპარაკებების უკან ბიძინა ივანიშვილის ფინანსური ინტერესები იყოს.

ახალი მემარჯვენეების წარმომადგენელი მანანა ნაჭყებია კურიერის პირდაპირ ეთერში აცხადებს, რომ დემოკრატიულ სახელმწიფოში ენერგეტიკის მინისტრი კახა კალაძე ასეთი მოქმედებებისთვის დაკარგავდა თანამდებობას.

ახალი პოლიტიკური ცენტრი გირჩის ხელმძღვანელი ზურაბ ჯაფარიძე ენერგეტიკის სამინისტროს აკრიტიკებს და ამბობს, რომ გაზპრომთან მიმდინარე მოლაპარაკებზე ბევრი კითხვებია. ზურაბ ჯაფარიძე ამბობს, რომ მოლაპარაკებებს შეიძლება ეკონომიკური, პოლიტიკური და კორუფციული შინაარსიც ქონდეს, მაგრამ მთავარი პრობლემა არის ხელისუფლება, რომელსაც "რაღაც აქვს დასამალი".

„ივანიშვილი ახორციელებს კრემლის ოცნებას“, - ლეიბორისტული პარტიის ლიდერი შალვა ნათელაშვილი გაზპრომთან მიმდინარე მოლაპარაკებებს ბიძინა ივანიშვილის მხრიდან ვლადიმერ პუტინის მიერ მიღებული დავალების შესრულებას უწოდებს.

შინაგან საქმეთა მინისტრი გიორგი მღებრიშვილი და მთავარი პროკურორი ირაკლი შოთაძე ქავთარაძის ქუჩაზე იმ კორპუსთან მივიდნენ, სადაც ცხედარი იპოვეს.

”თავისუფალი დემოკრატები” გენერალური მდივანი ალექსი პეტრიაშვილი სახელისუფლებო გუნდის განცხადებებს მიმოიხილავს და ამბობს, რომ მმართველი გუნდი თავად აღიარებს, რომ ამ მოლაპარაკებებში ეკონომიკური ინტერესი წამგებიანია.

პროკურატურის პრესსამსახურის განცხადებით, უწყება ქავთარაძის ქუჩაზე ნაპოვნ ცხედართან დაკავშირებით კომენტარს არ აკეთებს. 

საქართველოს ხელისუფლებისა და გაზპრომს შორის მიმდინარე მოლაპარაკებებს "საქართველოს რეფორმების ასოციაციის" ხელმძღვანელი ელენე ხოშტარია აპროტესტებს და აცხადებს, რომ მოლაპარაკებების გასაიდუმლოებული ფორმა სერიოზულ კითხვებს აჩენს.

არა "გაზპრომს" – რუსული ენერგო–გიგანტის საქართველოში შემოსვლის გასაპროტესტებლად ხალხი მთავრობის კანცელარიასთან შეიკრიბა. არასამთავრობო ორგანიზაციების წარმომადგენლებმა, ცნობილმა ადამიანებმა, სხვადასხვა პროფესიისა და რიგითმა მოქალაქეებმა დღეს რუსული მონოპოლისტის წინააღმდეგ აქცია გამართეს.

სამეგრელო–ზემო სვანეთის საოლქო პროკურორი ვახტანგ ქირია, სავარაუდოდ, მოკლული იპოვეს. გაუჩინარებულ პროკურორს 5 დღის მანძილზე ეძებდნენ.

სავალუტო ჯიხურებში ერთი ამერიკული დოლარი 2.43 ლარია. ეროვნული ვალუტა ბოლო 10 დღის განმავლობაში ყოველდღიურად ეცემა და დოლართან მიმართებით 2.4054-დან 2.4250 -მდე გაიზარდა. მომხმარებელს 1000 დოლარის შეძენა 20 ლარით გაუძვირდა.

არასრულწლოვანებს მცირე ზომის აფთიაქები ისე ყიდიან, რომ მოზრდებს არც პირადობის მოწმობას სთხოვენ და არც ექიმის მიერ გამოწერილ რეცეპტს.

გაზის აფეთქებას იტალიაში 5 ადამიანი ემსხვერპლა. უბედური შემთხვევა ქვეყნის ჩრდილო დასავლეთით მდებარე ქალაქ არნასკოში მოხდა.

ტაივანს პირველი ქალი პრეზიდენტი ჰყავს. ადმინისტრაციის და საკანონმდებლო ორგანოს ხელმძღვანელის არჩევნები რამდენიმე საათის წინ დასრულდა.

უსახლკაროთა ახალი თავშესაფრის მიღმა დარჩენილი ადამიანები მე-19 დღეა ისევ ღია ცის ქვეშ ცხოვრობენ. მიუსაფართა განმარტებით, თავშესაფრის ადმინისტრაციას დაბრუნების თხოვნით არაერთხელ მიმართეს, თუმცა ყინვების მიუხედავად მათ უარით ისტუმრებენ.

მოთხილამურე პატრულის პროექტის მოსამზადებელი სამუშაო შეხვედრა გაიმართა გუდაურში. შინაგან საქმეთა სამინისტროს მონიტორინგის ჯგუფის წევრებმა სათხილამურო ტრასები და ინფრასტრუქტურა დაათვალიერეს და პროექტის მიზნები დამსვენებლებსა და სპორტსმენებს გააცნეს.

გაზპრომის საწინააღმდეგო აქცია გაიმართა თბილისში მთავრობის ადმინისტრაციასთან. ერთიანი ლოზუნგით გაერთიანებულმა ადამიანებმა ხელისუფლებას კრემლის უმსხვილეს კომპანიასთან მოლაპარაკებების შეწყვეტისკენ მოუწოდეს.

ხელისუფლების მხრიდან გაზპრომთან მიმდინარე მოლაპარაკებებით სამი ადამიანი იხეირებს და დანარჩენი საქართველო იზარალებს. ამის შესახებ სახელმწიფო კანცელარიასთან მიმდინარე აქციაზე საზოგადოებრივი მოძრაობა «ივერიას» დამფუძნებელმა ნიკა რურუამ განაცხადა. მისი თქმით, ხელისუფლებამ საზოგადოების პროტესტი უნდა გაითვალისწინოს და მიმდინარე მოლაპარაკებები უნდა შეაჩეროს.

ინდონეზიაში 12 პირი დააკავეს, რომლებიც ჯაკარტას ტერაქტში არიან ეჭვმიტანილი. პოლიციის ინფორმაციით, დაკავებულებს ისლამისტ ბაჰრუნ ნაიმთან აქვთ კავშირი, რომელიც ამჯამად ისლამური სახელმწიფოს (ISIS) რიგებშია და სირიაში იმყოფება.

ეს არის დივერსია საკუთარი ქვეყნის წინააღმდეგ - ასე აფასებენ გაზპრომის საწინააღმდეგო აქციის წევრები, რომლებიც სახელმწიფო კანცელარიასთან უკვე ორი საათია ხელისუფლების გადაწყვეტილებას აპროტესტებენ.

საპროტესტო აქცია გაიმართა სოფელ გაჩიანში. მოსახეობამ მძიმე სოციალური ფონი გააპროტესტა და ხელისუფლებას დახმარება სთოხევა.

წინამძღვრიშვილის 100 ნომერის მოსახლეობა საბავშვო ბაღის მშენებლობას აპროტესტებს. ძველი ნაგებობის დემონტაჟი ერთი წლის წინ განხორციელდა, ადგილობრივების თქმით ტერიტორიაზე ახლა მერია 2 სართულიანი შენობის აღმართვას გეგმავს.

თბილისის ცენტრში მანქნა დაწვეს. ლენდკრუიზერის მარკის ჯიპს ცეცხლი ჯანაშიას ქუჩაზე წაუკიდეს.

დედაქალაქის მერია აბესაძის ქუჩაზე მომხდარი ხანძრის ხელოვნურად გამოწვევას არ გამორიცხავს. ამის შესახებ ნათქვამია მერიის მიერ გავრცელებულ სპეციალურ განცხადებაში.