Новости за 25.08.2015

თამარაშვილის ქუჩაზე მაღალი სიჩქარით მოძრავი ტოიოტას მარკის ავტომობილი ხეს შეეჯახა. ავტოსაგზაო შემთხვევის შედეგად მანქანაში მჯდომი ორივე მგზავრი დაშავდა, თუმცა მათ სერიოზული დაზიანებები არ მიუღიათ. 

ძლიერი წვიმის შედეგად სამეგრელოში 35 კილოვატიანი ელექტროგადამცემი ხაზი გაითიშა, რის გამოც 11 სოფელი და ქალაქ ზუგდიდის ერთი ნაწილი ჩაბნელებულია. დენი გათიშულია ანაკლიის საკურორტო ზონაშიც, როგორც რუსთავი 2  კორესპონდენტი იუწყება, ელექტროგადამცემი ხაზი რამდენიმე ქვესადგურს ამარაგებდა, რის გამოც ასობით აბონენტს ელექტროენერგია არ მიწოდება. ძლიერი წვიმის შედეგად აღდგენითი სამუშაობის დაწყება ვერ ხერხდება. 

ფოთში ამ დრომდე ინტენსიურად წვიმს, დატბორილია ცენტრალური ქუჩები. წყალმა მოსახლეობა დააზარალა. წვიმის შედეგად დაგროვილი და მოვარდნილი წყალი საცხოვრებელი სახლების პირველ სართულებზე შევარდა. დაზიანებულია საყოფაცხოვრებო ნივთები და ტექნიკა. 

ქუთაისში გამსახურდიას ქუჩაზე საცხოვრებელი სახლი იწვის. ამ წუთებში ადგილზე სამაშველო სამსახური ცეცხლის ჩაქრობას ცდილობს. ერთსართულიან საცხოვრებელ სახლს ხანძარი რამდენიმე წუთის წინ გაუჩნდა.

ძლიერი წვიმის შედეგად ბათუმის რკინიგზის სადგური დაიტბორა. ამის შესახებ რუსთავი 2-ს ადგილობრივებმა აცნობეს.

ბათუმში 4 ბალიანი შტორმია. ამის შესახებ ინფორმაცია რუსთავი 2-ს ბათუმის საკრებულოს თავმჯდომარემ ირაკლი ჭეიშვილმა მიაწოდა.

ბათუმის გარდა ძლიერი წვიმაა ფოთშიც. არსებული ინფორმაციით ქალაქის რამდენიმე უბანში წყალდიდობაა, მოსახლეობა კი დახმარებას ითხოვს.

სტიქიის შედეგად ბათუმში ელექტროგადამცემი ხაზები დაზიანდა რის გამოც ქალაქს ელექტროენერგია არ მიეწოდება. ამის შესახებ რუსთავი 2-ს ბათუმის საკრებულოს თამჯდომარემ ირაკლი ჭეიშჭვილმა განუცხადა.

ბათუმის მსგავსად დღეს საღამოს ძლიერი წვიმა იყო ანაკლიაში, რის გამოც ადგილზე ელექტროენერგია გაითიშა და მისი მიწოდება ამ დრომდე არ აღდგენილა.

ბათუმში ჭაობის დასახლებაში ამ დრომდე მძიმე ვითარებაა. არსებული ინფორმაციით დატბორილია რამდენიმე საცხოვრებელი სახლი. 

ბათუმში სტიქიას ებრძვიან. ადგილობრივი სამაშველოების დასახმარებლად ბრიგადები თბილისიდან და სხვადასხვა რეგიონებიდანაც წავიდნენ.

დღეს საღამოს მოსულმა უხვმა ნალექმა ბათუმის ქუჩები დატბორა. როგორც ადგილობრივები იტყობინებიან წვიმის შედეგად დაიტბორა სახლები. სამაშველო სამსახურს ზოგიერთ ქუჩაზე ჩარჩენილი მანქანების გამოყვანა უწევთ.

აი ქალჩერ ორკესტრა ბათუმში. ერთ–ერთი ცნობილი ინტერნაციონალური ორკესტრი საქართველოში თავის პირველ კონცერტს გამართავს სოლისტთან ერთად. ლიზა ბათიაშვილი გუნდის ახალი წევრია, თუმცა თავად ორკესტრმა, რომლის შემადგენლობაც ყოველწლიურად იცვლება, თავისი 4 წლიანი არსებობის პერიოდში უკვე მოსაწრო მსოფლიოს 22 ქალაქში სტუმრობა.

ამილახვართა არაპირდაპირი შთამომავლის მიერ კასპში ისტორიული ძეგლის საკუთარ სახელზე დარეგისტრირება დღეს ადგილობრივმა მოსახლეობამ სასახლის ეზოში შეკრებით გააპროტესტა და უკანონო გადაწყვეტილების ბათილად ცნობა მოითხოვა.

8 გარდაცვლილი და 3 დაკარგული მოქალაქე -ეს არის იმ სტიქიის შედეგი რომელიც წუხელ ღამით საქართველოს საზღვართან ახლოს მდებარე ართვინის პროვინციაში მოხდა. შავი ზღვის სამხრეთ–აღმოსავლეთ სანაპიროზე ძლიერი წვიმა გვიან ღამით დაიწყო, რამდენიმე საათის განმავლობაში გადაუღებელმა ნალექმა მდინარეების ადიდება გამოიწვია, წყლის ნაკადმა ორი შენობა მთლიანად დაანგრია.

გამსახურდიას გამზირზე გზის საფარის დაგება ფეხით მოსიარულეებს საფრთხეს უქმნის. როგორც ადგილობრივები ყვებიან ქუჩაზე არა ერთი მოქალაქე დაშავებულა.

ბოლო ინფორმაციით 4 წლის ანდრია დვალიშვილი დუისბურგის სამედიცინო ექსპერტიზის ბიუროშია გადასვენებული, თუმცა გერმანიაში მყოფ ოჯახის ახლობლებს ცხედარი ამ დრომდე არ უნახავთ.

საფრანგეთის საელჩოს სტუდენტები შეურაცხყოფის მიყენებაში ადანაშაულებენ. მათ შორისაა ნიკოლოზ ლეჟავა, რომელიც შარშან საფრანგეთში, საერთაშორისო მუსიკალურ აკადემიის საუკეთესო სტუდენტად დაასახელეს, წელს ის პარიზში სწავლის გასაგრძელებლად და ალბომის ჩასაწერად მიდიოდა, თუმცა ვიზაზე უარი უთხრეს.

დაპირების მიუხედავად გარემოს დაცვის სამინისტროს მიერ მომზადებული დოკუმენტი თბილისის სტიქიის ზონებთან დაკავშირებით ჯერ ისევ არ გასაჯაროვებულა. ამ დასკვნის შინაარსი, მხოლოდ იმ უწყებათშორისი კომისიის წევრებმა იციან, რომლებაც ეს დოკუმენტი დღეს დაამტკიცეს.

შემოდგომაზე მთავრობაში საკადრო ცვლილებებს ელოდებიან. ინფორმაცია მედიის საშუალებით ბოლო დღეებია აქტიურად ვრცელდება, თუმცა ოფიციალურად მოსალოდნელ ცვლილებებს მინისტრთა კაბინეტის წევრები არ ადასტურებენ.

თბილისის მერია კომუნალური ვაუჩერების სუბსიდირებას აღარ გეგმავს, რაც იმას ნიშნავს, რომ დღემდე არსებულ დახმარებას მუნიციპალიტეტისგან თბილისელები ვეღარ მიიღებენ.

მთავრობა ამ ეტაპზე ბიუჯეტის კორექტირებას არ გეგმავს და არც ხარჯების შემცირებაზეა საუბარი. მიუხედავად იმისა, რომ ჯერ კიდევ გუშინ ეკონომიკის მინისტრი გამოსავალს სწორედ ადმინისტრაციული ხარჯების შემცირებაში ხედავდა.

დღის განმავლობაში ლარის კურსი დოლართან და ევროსთან მიმართებაში რამდენჯერმე შეიცვალა. დღის ბოლოს სავალუტო ჯიხურებსა და კომერციულ ბანკებში ერთი დოლარის ღირებულება 2 ლარი და 45 თეთრიდან, 2 ლარსა და 49 თეთრამდე მერყეობს.

საქართველოს ეროვნულმა ვალუტამ არსებობის ისტორიაში გაუფასურების რეკორდი მოხსნა. ეროვნული ბანკის მონაცემებით ერთი ამერიკული დოლარი უკვე 2.41 ლარია, თუმცა სავალუტო ჯიხურებში დღეს 2.49–ც იყო დაფიქსირებული.

გორში VTB ბანკის ფილიალი დააყაჩაღეს. ყაჩაღობა დღისით სამუშაო საათების ამოწურვის დროს მოხდა. უცნობია დამნაშავე მარტო მოქმედებდა თუ თანამზრახველთან ერთად. როგორც ცნობილია ყაჩაღობის დროს ბანკის შენობაში მხოლოდ ერთი პირი იმყოფებოდა, რომელსაც სახეზე სამედიცინო პირბადე ჰქონდა აფარებული.