გამოკითხულ უკრაინელთა მხოლოდ 9% მიიჩნევს სტალინს "დიდ ბელადად"
სოციოლოგები ხაზს უსვამენ, რომ სტალინის პიროვნების მიმართ დამოკიდებულება საზოგადოებაში მიმდინარე დეკომუნიზაციის პროცესის დამახასიათებელი ერთ-ერთი მაჩვენებელია. საბჭოთა დიქტატორ სტალინისადმი დამოკიდებულების შესახებ KIIS-ი დროდადრო სხვადასხვა ფორმულირებით სვამს შეკითხვებს. ბოლო გამოკითხვაში სოციოლოგებმა მოქალაქეებს ჰკითხეს, მიიჩნევენ თუ არა სტალინს დიდ ბელადად.
სოციოლოგების დაკვირვებით, მცირდება იმ რესპოდენტების რაოდენობა, რომლებსაც სტალინის სიდიადის სჯერათ. მაგალითად, 1991 წელს, უკრაინის დამოუკიდებლობის გამოცხადებისთანავე, გამოკითხულთა 27% მიიჩნევდა სტალინს დიდ ბელადად. შემდეგ ეს პროცენტი გაიზარდა და 2002 წელს თითქმის 40% იყო. 2019 წელს ასე ფიქრობდა 26%, ხოლო 2021 წელს - 16%.
2023 წლის სექტემბერ-ოქტომბერში ჩატარებული კვლევა მიუთითებს, რომ გამოკითხულთა 72% სტალინს დიდ ბელადად არ მიიჩნევს, კიდევ 18%-ს უჭირს პასუხის გაცემა.
უკრაინისგან განსხვავებით, რუსეთში სტალინისა და სხვა კომუნისტი სამხედრო-პოლიტიკური ლიდერების მიმართ ბოლო წლებში სულ უფრო იზრდება ინტერესი.
წელს, თებერვლის დასაწყისში, რუსეთის ქალაქ ვოლგოგრადში გახსნეს საბჭოთა დიქტატორის,, იოსებ სტალინის ბიუსტი. ხოლო ვოლგოგრადის მუზეუმ-პანორამის მოედანზე, სტალინის გარდა, დადგეს მარშლების, ჟუკოვის და ვასილევსკის ბიუსტები.