დონეცკის რეგიონის ქალაქ ვოლნოვახში მოკლულია ათი ადამიანი, მათ შორის ბავშვები
რუსეთის საგამოძიებო კომიტეტმა ახლახან გამოაცხადა სისხლის სამართლის საქმის აღძვრის შესახებ, ორი და მეტი პირის მკვლელობის მუხლით. ცნობაში ნათქვამია, რომ მოკლულთა გვამები აღმოაჩინეს კერძო სახლში, მათ ცეცხლსასროლი იარაღით მიყენებული ჭრილობები აღენიშნებოდათ, სახლი ეკუთვნოდა დაღუპულ ოჯახს.
ტელეგრამის არხი "ასტრა" ადგილობრივ ხალხზე, მეზობლებზე და მოკლულთა ნათესავებზე დაყრდნობით იუწყება, რომ მკვლელობა რუსმა სამხედრომ ჩაიდინა. არხის წყაროთა ვერსიით, დანაშაული მოხდა 27 ოქტომბერს, დონეცკის ქუჩაზე მდებარე კერძო სახლში, რომელიც ეკუთვნოდა ოჯახს - ცოლ-ქმარს ორი შვილით, სკოლის მოწაფე გოგონათი და 4 წლის ბიჭით. არხი წერს, რომ მოკლეს ყველა მათგანი, და კიდევ ხუთი სტუმარი, რომლებიც იმ მომენტში ოჯახთან ერთად დაბადების დღეს აღნიშნავდნენ.
მკვლელობების გარემოებები გაურკვეველი რჩება. "ასტრას" ზოგმა წყარომ უთხრა, რომ მკვლელობებამდე ცოტა ხნით ადრე რუს ჯარისკაცს კონფლიქტი მოუვიდა სახლის მფლობელთან. ზოგიერთი ცნობის თანახმად, მკვლელობები ჩაიდინეს მოტოციკლებით მოძრავმა სამხედროებმა, იმ დროს, როცა სახლში მყოფ პირებს ეძინათ.
რუსეთის ხელისუფლების, არმიის და საგამოძიებო კომიტეტის წარმომადგენლებს ამ ცნობებზე არ გაუკეთებიათ ოფიციალური განცხადება.
ვოლნოვახი რუსი სამხედროების მიერ ოკუპირებულ იქნა 2022 წლის მარტში, ბრძოლების შედეგად დაინგრა ქალაქის მნიშვნელოვანი ნაწილი. ამჟამად ის ფრონტის ხაზიდან მეტნაკლებად მოშორებით მდებარეობს. რუსეთის ხელისუფლება ამ ქალაქს, ისევე, როგორც დონეცკის მთელ ოლქს, რუსეთის ტერიტორიად მიიჩნევს.