რუსეთმა და ჩინეთმა იაპონიის ზღვაში სამხედრო მანევრები დაიწყეს
მოსკოვსა და პეკინს შორის ურთიერთობა უფრო მჭიდრო გახდა მას მერე, რაც რუსეთი შარშან უკრაინაში შეიჭრა და ჩინეთმა არ დაგმო ეს ნაბიჯი.
რუსეთის საგარეო საქმეთა სამინისტრომ განაცხადა, რომ მთავარი მიზანი სწავლებისა, რომელიც 23 ივლისამდე გაგრძელდება, არის „სამხედრო-საზღვაო თანამშრომლობის გამტკიცება ორ ქვეყანას შორის და აზია-წყნარი ოკეანის რეგიონში სტაბილურობისა და მშვიდობის შენარჩუნება“.
სწავლების დროს გემების საჰაერო თანხლების, საზღვაო-საბრძოლო მოქმედებების დამუშავებასთან ერთად დაგეგმილია „ერთობლივი საარტილერიო სროლა“. სამინისტროს ცნობით, რუსეთის მხრიდან მანევრებში მონაწილეობენ ორი მოიერიშე ხომალდი, ორი კორვეტი, ასევე დამხმარე ხომალდები.
პეკინმა გამოაცხადა, რომ სწავლებაში ჩართულია მისი ხუთი საბრძოლო ხომალდი და ერთი მართვადი რაკეტებით აღჭურვილი ნაღმოსანი ხომალდი. ორივე მხრიდან მანევრებში მონაწილეობს სამხედრო-საჰაერო ფლოტის 30 საფრენი აპარატი.
გასულ თვეში ჩინეთმა და რუსეთმა ერთობლივი საჰაერო პატრულირება მოაწყვეს იაპონიის და აღმოსავლეთ ჩინეთის ზღვების თავზე, რის გამოც სამხრეთმა კორეამ გაფრთხილების მიზნით იქ თავისი გამანადგურებლები გააგზავნა.
2019 წლის შემდეგ ეს რუსეთ-ჩინეთის უკვე რიგით მეექვსე ერთობლივი პატრულირებაა ამ რეგიონში.