„მნიშვნელოვანია, არ იყოს შეზღუდული გამოხატვის თავისუფლება" - იოსელიანი აქონდროპლაზიის მქონე ბავშვების მშობლების აქციის შესახებ

მთავრობის ადმინისტრაციის შენობასთან აქონდროპლაზიის მქონე ბავშვების მშობლების აქციაზე მივიდა საქართველოს სახალხო დამცველი ლევან იოსელიანი. ომბუდსმენს მიაჩნია, რომ არ უნდა იყოს შეზღუდული გამოხატვის თავისუფლება და აქციის მონაწილეებს ღირსეული პირობები უნდა ჰქონდეთ.


„როდესაც პრობლემა დადგა, პირველი დღიდანვე ჩავერთეთ პროცესში. სახალხო დამცველის აპარატის მეცადინეობით სამუშაო ჯგუფი შეიქმნა. ჩვენ ამ სამუშაო ჯგუფში დღემდე აქტიურად ვმონაწილეობთ ჯანდაცვის სამინისტროსთან, რომ ეს პრობლემა გადაწყდეს ბავშვების ინტერესებიდან გამომდინარე.


რაც შეეხება აქციას, ჩვენ ამ აქციის მიმართ მონიტორინგი არ შეგვწყვეტია, გამოხატვის თავისუფლების ნაწილში რაიმე ტიპის შეზღუდვას თუ ექნება ადგილი ან რაიმე პრობლემა იქნება, აქაც ჩართულები ვართ და მონაწილეობენ ჩვენი აპარატის თანამშრომლები.


მეც ადამიანურად ძალიან მაწუხებს, რომ ამ ადამიანებს კანცელარიაში არ ეძლევათ საშუალება, პირადი ჰიგიენის საკითხები მოიწესრიგონ. მოვუწოდებდი კანცელარიის ადმინისტრაციას, რომ მისცენ მათ შესაძლებლობა, ისარგებლონ საპირფარეშო იქნება თუ ხელსაბანი. მნიშვნელოვანია, არ იყოს შეზღუდული გამოხატვის თავისუფლება, მეორე მხრივ კი, ღირსეულ პირობებში შეეძლოთ ამის გაკეთება", - განაცხადა ლევან იოსელიანმა.


აქციაზე სახალხო დამცველის მისვლას ერთ-ერთი მშობელი მოითხოვდა.


იოსელიანმა აღნიშნა, რომ მას მშობლებთან შეხვედრის პრობლემა არ აქვს, თუმცა ისიც თქვა, რომ მას, ძირითადად, პოლიტიკოსები უკავშირდებოდნენ და სთხოვდნენ აქციაზე მისვლას. სახალხო დამცველმა განაცხადა, რომ პოლიტიკოსებთან ერთად დემონსტრაციაზე მისვლა მისი საქმიანობის ნაწილი არ არის. 






აქონდროპლაზიის მქონე ბავშვების მშობლები ისევ პრემიერ-მინისტრთან შეხვედრას მოითხოვენ.


პრემიერ-მინისტრმა მთავრობის დღევანდელ სხდომაზე განაცხადა, რომ აქონდროპლაზიის მქონე ბავშვების სიცოცხლეს საფრთხე არ ემუქრება. ირაკლი ღარიბაშვილმა ასევე თქვა, რომ "ქვეყანა, სადაც ეს წამალი გამოიგონეს, თავად არ აფინანსებს".


წელიწადზე მეტია, აქონდროპლაზიის მქონე ბავშვების დედები პრეპარატ "ვოსორიტიდის" შემოტანასა და დაფინანსებას ითხოვენ. მშობლების ნაწილი ბოლო რამდენიმე დღეა, ღამეებს მთავრობის კანცელარიასთან ათენებს. აქცია გაიმართა გუშინ, 23 აპრილსაც და დღესაც.


აქციის ორგანიზატორები აცხადებენ, რომ ეს წამალი სასიცოცხლოდ მნიშვნელოვანია აქონდროპლაზიის სინდრომის მქონე ბავშვებისთვის და მის მიღებას მხოლოდ 14-16 წლის ასაკამდე აქვს შედეგი.


საქართველოს შრომის, ჯანმრთელობისა და სოციალური დაცვის მინისტრის მოადგილის, თამარ გაბუნიას თქმით, "ვოსორიტიდის" საქართველოში შემოტანის პროცედურებს მხოლოდ იმ შემთხვევაში დაიწყებენ, თუ მიმდინარე წლის სექტემბრის ბოლომდე, ევროკავშირის თუნდაც რამდენიმე ქვეყანაში დადასტურდება ამ მედიკამენტით პაციენტების უზრუნველყოფა.