ცესკო: ამომრჩეველთა აქტივობა 10 საათისთვის 7,41%-ია
შედარებისთვის, 2020 წლის საპარლამენტო არჩევნებზე 10:00 საათზე ამომრჩეველთა აქტივობა 8,33% იყო, ხოლო 2017 წლის თვითმმართველობის არჩევნებზე კი - 6,74%.
რეგიონების მიხედვით 2 ოქტომბრის ადგილობრივი თვითმმართველობის არჩევნებზე 10 საათისთვის ყველაზე მაღალი აქტივობა, 11,2% , რაჭა-ლეჩხუმში დაფიქსირდა. ყველაზე დაბალი აქტივობა ქვემო ქართლშია და იგი 6,1%-ს შეადგენს.
ცენტრალური საარჩევნო კომისიის პრესსპიკერის, ნათია იოსელიანის განმარტებით, ამ დროისათვის საარჩევნო უბნებზე ხმის მიცემის პროცესი მშვიდ ვითარებაში მიმდინარეობს და ამომრჩევლებს აქვთ შესაძლებლობა, თავისუფლად, ყოველგვარი დაბრკოლების გარეშე განახორციელონ თავიანთი კონსტიტუციური უფლება და გამოხატონ თავიანთი ნება.
საქართველოში მიმდინარეობს მუნიციპალიტეტის ორგანოთა არჩევნები. ხმის უფლების მქონე მოქალაქეები ირჩევენ 64 მუნიციპალიტეტის მერებს და საკრებულოების წევრებს. პროპორციული და მაჟორიტარული წესით აირჩევა საკრებულოების სულ 2068 წევრი. 2 ოქტომბრის არჩევნებში 43 პარტია მონაწილეობს.
მერის არჩევნების პირველივე ტურში გასამარჯვებლად კანდიდატმა ხმების 50%-ზე მეტი უნდა მიიღოს. 40%-იანი ბარიერი მოქმედებს საკრებულოების მაჟორიტარი წევრების ასარჩევად.
პროპორციული სისტემით საკრებულოს წევრების ასარჩევად ყველა მუნიციპალიტეტში, გარდა თბილისისა, ბარიერი 3%-ია. თბილისის საკრებულოში მოსახვედრად პარტიებმა უნდა მიიღონ ხმების არანაკლებ 2.5%. ამომრჩეველთა საერთო რაოდენობაა 3 497 345.
2 ოქტომბრის თვითმმართველობის არჩევნებს, ევროპული საბჭოს პრეზიდენტის ინიციატივით, „ქართულ ოცნებასთან“ აპრილში ხელმოწერილი შეთანხმების დათქმის საფუძველზე რეფერენდუმად მიიჩნევს ოპოზიციური პარტიების უმეტესობა. შარლ მიშელის დოკუმენტის ამ დათქმით, თუ ადგილობრივ არჩევნებში „ქართული ოცნება“ ხმების 43%-ზე ნაკლებს მიიღებს, მომავალ წელს რიგგარეშე საპარლამენტო არჩევნები უნდა ჩატარდეს. ივლისის ბოლოს, მმართველმა პარტიამ „მიშელის შეთანხმება“ ანულირებულად გამოაცხადა. მას შემდეგ „ქართული ოცნების“ ლიდერები აცხადებენ, რომ საპარლამენტო არჩევნები კონსტიტუციურ ვადაში - 2024 წელს ჩატარდება.