აშშ-ის ელჩის წარმომადგენელი საელჩოსთან მოშიმშილე შუქრუთელებს შეხვდა
ერთ-ერთი მოშიმშილე გიორგი ნეფარიძე, რადიო თავისუფლებას ეუბნება, რომ საელჩოს წარმომადგენელმა მათ პროცესში ელჩის, კელი დეგნანის ჩართულობა დაუდასტურა:
„ცოტა ხნის წინ გამოვიდა ელჩის წარმომადგენელი ჩვენთან. გვითხრა, რომ ქალბატონი დეგნანი ჩვენს წერილსა და ჩვენს პრობლემას გაეცნო. მან ასევე გვითხრა, რომ ელჩი დაუკავშირდა რამდენიმე უწყებას, მათ შორის, სახალხო დამცველსაც და დაგვიდასტურა, რომ ამ პროცესში ელჩი ჩაერთვება“.
შეგახსენებთ, თბილისში, ამერიკის საელჩოსთან დაბანაკებულმა შუქრუთელებმა ელჩ კელი დეგნანს დახმარების თხოვნის წერილი 31 მაისს, საღამოს გაუგზავნეს. მადნის მოპოვებით დაზარალებული შუქრუთელები აშშ-ის ელჩს მათი პრობლემით დაინტერესებას და ხელისუფლებასთან შუამდგომლობას სთხოვენ.
ჭიათურის მუნიციპალიტეტის სოფელ შუქრუთის 10 ოჯახის წარმომადგენლები, მესამე დღეა თბილისში, აშშ-ის საელჩოსთან სხედან. მადნის მოპოვებით დაზარალებულთა პროტესტმა, რომელიც უკვე 106 დღეა, სოფელ შუქრუთში, კოროხნალის მაღაროსთან მიმდინარეობს, 30 მაისს თბილისში გადმოინაცვლა. ისინი 22-ე დღეა შიმშილობენ. მოშიმშილეების ნაწილმა, ხუთმა კაცმა და სამმა ქალმა პროტესტის ნიშნად პირი ამოიკერა.
ამავე თემაზე: შუქრუთელები ამერიკის ელჩის მოლოდინში - როდის უპასუხებს ელჩი მათ წერილს?