„ქართული ოცნება" გადაწყვეტს, პრემიერთან ერთად მოლაპარაკებაში ვინ მიიღებს მონაწილეობას
„ქართული ოცნების" გენერალურმა მდივანმა დაამატა: „თუ ჩვენ ვფიქრობთ ჩვენს მომავალზე, ჩვენი ქვეყნის განვითარებაზე, იმაზე, რომ ქვეყანაში იყოს სტაბილურობა, სიმშვიდე, ქვეყნის ეკონომიკური განვითარება, არსებული პანდემიის ძალიან სწრაფად დაძლევა, ამისთვის ძალიან მნიშვნელოვანია ქვეყანაში სიმშვიდე, სტაბილურობა. კიდევ ერთხელ მინდა ხაზგასმით აღვნიშნო, რომ დიალოგს, მოლაპარაკებას არ აქვს ალტერნატივა, ასევე - კომპრომისებს".
ხელისუფლებასთან დიალოგში პრემიერ-მინისტრ ირაკლი ღარიბაშვილის მონაწილეობის წინააღმდეგია ოპოზიციის ნაწილი.
ევროპული საბჭოს პრეზიდენტ შარლ მიშელის ინიციატივით და მისი უშუალო მონაწილეობით, 1 მარტს თბილისში გაიმართა ოპოზიციის ლიდერების და პრემიერ-მინისტრ ირაკლი ღარიბაშვილის შეხვედრა.
მოლაპარაკების გაგრძელების თარიღი ამ დრომდე უცნობია, თუმცა, პროცესში ღარიბაშვილის მონაწილეობის გაგრძელებას ეწინააღმდეგება პარტია „ლელო“. მისი არგუმენტია ტელეკომპანია „პირველის“ მიერ 6 მარტს გავრცელებული ფარული აუდიოჩანაწერები, რომლებიც ტელეარხის მტკიცებით, ასახავს ირაკლი ღარიბაშვილის, „ქართული ოცნების“ დამფუძნებლის, ბიძინა ივანიშვილის ვაჟის, ბერა ივანიშვილის და სახელმწიფო დაცვის სპეციალური სამსახურის უფროსის ანზორ ჩუბინიძის საუბრებს, სოციალურ ქსელებში მიუღებელი კომენტარების გამო, არასრულწლოვნის მიმართ ანგარიშსწორების შესახებ.
დიალოგში ღარიბაშვილის მონაწილეობის წინააღმდეგია თბილისის ყოფილი მერი გიგი უგულავა.
ამ ჩანაწერების გავრცელებას მოჰყვა საპროტესტო აქციები და პრემიერ-მინისტრის თანამდებობიდან ირაკლი ღარიბაშვილის გადადგომის მოთხოვნა.
მმართველ პარტიაში განაცხადეს, რომ „პირველის“ ეთერში გასული მასალა ფაბრიკაციაა და 2010-2011 წლებში ფარულად ჩაწერილი სხვადასხვა საუბრის კომპილაციას წარმოადგენს. "ქართული ოცნების" თანახმად, "რადიკალურ ოპოზიციას სურს, ჩანაწერები გამოიყენოს მოლაპარაკებებზე უარის თქმის საბაბად".