«Тĕрленĕ Раççей» фестиваль
Республика Пуçлăхĕ Олег Николаев паян Раççей этнографи музейĕн директорĕпе Юлия Купинăпа тĕл пулчĕ. Унта вĕсем «Тĕрленĕ Раççей» фестивале çĕршыв шайĕнче ирттересси пирки калаçрĕç.
2 метр сарлакăш, 3 метр вăрăмăш. Раççейри кашни регион тĕрленĕ хăйĕн карттине хатĕрлет. Ăна тĕрлĕ эрешпе илемлетмелле вĕсен. «Пысăк та пĕлтерĕшлĕ çак проект çĕршыв мăнаçлăхне кăтартма пулăшать, фестивале Чăваш Енре ирттерме палăртни пире уйрăмах савăнтарать», – терĕ Чăваш Республикин Пуçлăхĕ Олег Николаев. 20 регион халех çак проекта хутшăнма кăмăл тунă. Этнографи тĕнчипе тĕплĕ паллашма пулăшнăшăн, тĕрлĕ халăх культурин пуянлăхне аталантарма тăрăшнăшăн Олег Николаев Раççей этнографи музейĕн директорне Юлия Купинăна тав турĕ. Тĕл пулура «Чăваш тĕрри: туй тутрисем тата Раççей этнографи музейĕн пуххинчи пĕркенчĕксем» альбом-каталог кăларасси пирки калаçса татăлчĕç. Çавăн пекех «Культура» наци проекчĕпе килĕшӳллĕн курав йĕркелеме палăртнă.