Чаллы лифтында шәрә хатын гәүдәсе табылган
8 июльдә иртән Чаллыда күп катлы йорттагы лифтта хатын-кыз мәете табылган. Ул шәрә булган. Бу турыда РЕН ТВ хәбәр итте.
Иртә белән бу йортта яшәүчеләр лифт туктап калуга зарлана. Аны төзәтү өчен механик килә.
«Механик лифтны ачкач, кабинка эчендә 35 яшьлек хатын-кыз мәете күрә. Ул вәхшиләрчә кыйналган була. Мәет өстендә киемнәр булмый. Мәрхүмәнең яңак сөяге сынуы, эчке органнары ярылу, кабыргалары сынуы ачыклана», – дигән РЕН ТВ чыганагы.
Әлеге хатынны үтерүдә шикләнеп, 47 яшьлек ир-ат тоткарланган. Ул моңа кадәр дә хөкем ителгән булган. Шушы ук йорттагы бер фатирда яши. Мәрхүмә хатын бу йортта яшәми. Тикшерү эшләре бара, диелә хәбәрдә.
«Татар-информ» Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицикийга сылтама белән хәбәр иткәнчә, җинаять эше ачылган. Җинаять Хәсән Туфан урамындагы йортта булган.