Қозоғистонда 800 йўловчи бораётган поезднинг 8та вагони ағдарилиб кетди (ВИДЕО)
Жамбил вилоятидаги поезднинг темир йўлдан чиқиб кетиши оқибатида 1 одам нобуд бўлди. Яна бири оёғида синиш жароҳатлари билан шифохонага ётқизилди.
Қозоғистон Ички ишлар вазирлиги Фавқулодда вазиятлар қўмитаси матбуот котибининг маҳаллий матбуотга билдиришича, ўлган 1 киши 2006 йилда туғилган ўсмирдир.
Ҳодиса Жамбил вилоятидаги Шу шаҳри яқинида 17 июнь куни маҳаллий вақт билан кундузги 1:45да содир бўлди.
Шунингдек, расмий маълумотларда, жами 14 киши тиббий ёрдамга мурожаат қилгани, булардан 1 нафари шифохонага ётқизилгани айтилмоқда.
Воқеа гувоҳларининг ижтимоий тармоқлар орқали улашган видео ва постларидан кўринишича, темир йўл рельсидан чиқиб кетган поездлар ёнбошига ағдарилиб кетган.
Қозоғистон Бош прокуратураси баёнотига кўра, 20та вагондан иборат поёзднинг 8та вагони изидан чиқиб кетган, сабаблар ўрганилмоқда.
Қозоғистон Инвестиция ва тараққиёт вазирлигига таяниб, Sputnik нашрининг хабар қилишича, ҳозирча ҳайдовчининг поездни қўққисдан тўхтатгани ҳалокатга сабаб бўлган, деб тахмин қилинмоқда.
"Ҳодиса машинист темир йўл рельси қийшайиб кетганини кўргач, поездни бирдан тўхтатганидан кейин содир бўлган", дея иқтибос келтирди вазирлик расмий баёнотидан Sputnik нашри.
Ҳодисани текшириш учун Қозоғистон Транспорт қўмитаси ва бошқа масъул органлар иштирокида махсус комиссия тузилди.
"Қозоғистон темир йўллари" ширкати берган маълумотга кўра, Олмота-Остона йўналишида бораётган поездда жами 829 йўловчи бўлган.
Ҳодисадан сўнг йўловчилар айни йўналишда қатнаётган бошқа поездлар билан манзилига йўлланмоқда.
Янгиликларни Озодликда кузатинг!