Спортда ирқчиликка қарши ташкилотнинг Санкт-Петербургдаги идораси ёпилди
Спортда ирқчиликка қарши кураш ва озчиликлар ҳақларини ҳимоя қилиш билан шуғулланадиган гуруҳларни бирлаштирувчи халқаро ташкилот Санкт-Петербург шаҳри мерияси жаҳон чемпионати арафасида бу шаҳардаги идорасини ёпиб қўйганини маълум қилди.
Fare Network номли ташкилоти футбол ишқибозларининг камситувчи хатти-ҳаракатларини тергов қилишда ФИФА ва УЕФАга ёрдам бериб келади.
Унинг вакили 16 июнь куни маълум қилишича, ташкилот шаҳарда ишлаб турган идораларидан бири- Diversity House (Ранг-баранг уй) лойиҳаси вакилларига берилган бино 14 июнь куни - жаҳон футбол биринчилиги арафасида олиб қўйилган.
‒ Улар (ташкилот идораси очилган бинонинг эгалари - таҳр.) бизга қўпол тарзда чиқиб кетишимизни айтди, электрни ўчириб қўйди ва хатти-ҳаракатларига ҳеч қандай изоҳ бермади, ‒ деди Санкт-Петербург шаҳри фаоли ва “Кубок одамлар учун” ташкилоти аъзоси Елена Белокурова. Ташкилот ҳозир бораётган футбол мусобақасидан олинадиган фойда Россия жамиятининг барча аъзоларига етиб бориши билан жамоатчилик кузатуви воситасида назорат қилиш билан шуғулланиш ниятида.
Тортиб олинган бинода шу пайтгача, турли кўргазма, учрашувлар ўтказиб келинаётган, шунингдек бу жой тақибларга учраётган жинсий озчиликлар учун "бошпана"га айланиб қолган эди.
Айни пайтда, Fare Network гуруҳига Москва шаҳрида идора очиши учун рухсат берилди ва унинг очилиш маросимида Россия ҳукумат ҳамда ФИФА вакиллари ҳам иштирок этди.
‒ Diversity House ташкилоти идорасининг бу тариқа ёпилиши Санкт-Петербургдаги ташкилотлар учун таниш ҳолат. Уларнинг билдиришича, шаҳар маъмурлари сиёсий қарашларига мос келмайдиган фаолият турларини шунақа усул билан тўхтатиб ташлайверади, ‒ деди Fare Executive ижрочи директори Пиара Повар.
Повар хонимга кўра, “айни ҳол Россиядаги консерватив сиёсий кучлар инсон ҳақларига оид гап-сўзларни “босди-босди” қилаётганидан далолат беради”.
Унинг айтишича, ФИФА бош котиби Фатма Самура айни муаммони “ўз номидан юқори ташкилотларга етказган, аммо натижа бўлмаган”.
ФИФА вакили Fare Network билан “тез-тез гаплашаётгани” ва “муаммога ечим топиш учун Санкт-Петербург ҳокимият идораларига мурожаат қилгани”ни айтди.
Рейтер ахборот агентлиги Санкт-Петерберг шаҳри ҳукумати изоҳ беришини сўраб, мурожаат қилгани, аммо ўз вақтида жавоб олмаганини маълум қилди.
Айни пайтда, Fare Network Санкт-Петербургнинг бошқа жойларида оффис очишни режалаштираётганини билдирди.