Бакуда Каюм Насыйри институтының белем бирү-мәдәни үзәге ачылды
Баку шәһәрендә Татарстан Республикасының Азәрбайҗан Республикасындагы Даими вәкиллеге базасында Казан федераль университеты каршындагы Каюм Насыйри институтының белем бирү-мәдәни үзәге ачылды. Бу хакта КФУның Филология һәм мәдәниятара багланышлар институты матбугат үзәге хәбәр итә.
Әлеге чара 2023 елның 23 ноябрендә Азәрбайҗан башкаласы – Баку шәһәрендә Татар мәгарифе көннәре кысаларында узды. Ачылыш тантанасында ТР мәгариф һәм фән министры Илсур Һадиуллин, Татарстанның Азәрбайҗандагы даими вәкиле Морат Гаделшин, КФУның Филология һәм мәдәниятара багланышлар институты директоры Рәдиф Җамалетдинов катнашты.
Шулай ук биредә Филология һәм мәдәниятара багланышлар институтының халыкара эшчәнлек буенча директор урынбасары Эльзара Гафиятова, «Каюм Насыйри институты» фәнни-белем бирү үзәге директоры Әлфия Йосыпова, Филология һәм мәдәниятара багланышлар институтының тел һәм мәдәниятара багланышлар кафедрасы доценты Ләйсән Шәяхмәтова, Баку шәһәренең татар диаспорасы вәкилләре дә булды.
Очрашуның рәсми өлешен ТР мәгариф һәм фән министры Илсур Һадиуллин ачты. Ачылыш тантанасында катнашучыларны сәламләп, ул Азәрбайҗан халкы һәм Кавказ артында яшәүче татарлар турында җылы сүзләр әйтте. Министр билгеләп үткәнчә, һәр халык милли үзенчәлеген, иң яхшы традицияләрен сакларга омтыла һәм моны туган телеңне белгән очракта гына эшләргә мөмкин, чөнки ул һәр халыкның рухи байлыгына ачкыч булып тора.
КФУның Филология һәм мәдәниятара багланышлар институты директоры Рәдиф Җамалетдинов Каюм Насыйриның XIX гасыр азагында татар мәгърифәтчелеге өчен күп эшләр башкаруы, тулаем алганда укыту процессы һәм шул еллар тарихына зур өлеш кертүе хакында сөйләде. Ул шулай ук Татарстанның Азәрбайҗандагы Даими вәкиллеге җитәкчелегенә җылы кабул иткән һәм үзәкне ачуда ярдәм күрсәткән өчен рәхмәт белдерде.
Әлеге сәфәр кысаларында Азәрбайҗан Республикасы мәгариф министры Эмин Амруллаев, Бәйсез Дәүләтләр Бердәмлеге, чит илдә яшәүче ватандашлар эшләре һәм халыкара гуманитар хезмәттәшлек федераль агентлыгының (Россотрудничество) Азәрбайҗандагы вәкиллеге җитәкчесе Ирек Зиннуров, Азәрбайҗан Фәннәр академиясе җитәкчелеге белән очрашулар оештырылды.
Шуннан соң делегация әгъзалары кайбер белем бирү учреждениеләрендә – Баку дәүләт университетында, Баку славян университетында, Азәрбайҗан дәүләт педагогика университетында булды.