Минтимер Шәймиев Мортаза Рәхимовның вафатына бәйле рәвештә кайгы уртаклашты
Татарстан Республикасы Дәүләт Киңәшчесе, Татарстан Республикасының беренче Президенты Минтимер Шәймиев, Башкортстанның беренче Президенты Мортаза Рәхимовның вафатына бәйле рәвештә, Башкортстан башлыгы Радий Хәбировка кайгы уртаклашу телеграммасы юллады. Анда язылганча, Мортаза Рәхимов Башкортстан һәм бөтен ил өчен иң катлаулы булган елларны лаеклы рәвештә үтә алды.
«Мортаза Гобәйдулла улының үз республикасы файдасы өчен башкарган күпьеллык сәяси, икътисади һәм иҗтимагый эшчәнлеге зур хөрмәткә лаек һәм үз халкына тугры хезмәт итүнең үрнәге булып тора», диелгән телеграммада. Бу юлларны Татарстан Республикасы Президентының матбугат хезмәте китерә.
Татарстан һәм Башкортстанның югары хакимият органнарының үзгәртеп кору чорындагы кайбер катлаулы проблемаларны җайга салу эше татарстанлылар өчен истәлекле, дип билгеләп үтте ул.
«Мин Мортаз Гобәйдулла улына күпьеллык нәтиҗәле хезмәттәшлек өчен рәхмәтлемен, безне үзара эшлекле, шул ук вакытта, халыкларыбыз арасында кебек үк, дуслык, тугандаш мөнәсәбәтләр дә бәйләде», – диелә ТР Дәүләт киңәшчесе телеграммасында.
Искәртеп узабыз, Мортаза Рәхимов 88 яшендә вафат булды. Аның белән хушлашу мәрасиме иртәгә, 13 гыйнварда, Уфадагы «Башкортостан» Дәүләт концертлар залында узачак. Теләге булган һәркем 9.00-12.00 сәгатьләрдә республиканың Беренче Президенты белән хушлашырга килә ала.