Qırımda mahküm etilgen Memet Belâlovnıñ babasına FSB binası ögünde «toplaşuvda» iştirak etkeni içün para cezası berildi
Onıñ haberine köre, mahkeme açıq oturışuvğa diñleyicilerni kirsetmeyip, COVID-19 ile bağlı sıñırlavlar aqqında ayttı. Qadı Yekaterina Çumaçenko prokuror kelişini temin etmege ve şaatlarnı ve memuriy protokol tizgen şahısnı sorğuğa çekilmesi içün çağırmağa istemedi.
Cemaat imayecisiniñ aytqanına köre, o, şaatlarnıñ şaatlıqları teşkerilsin, dep israr etti. Çünki olarnıñ sözlerinde milliy alâmetlerge köre adavetkâr munasebetni kördi. Mahkeme bu muracaatlarnı red etti.
Mahkeme Reşat Belâlovğa terciman bermedi. Qadı, Belâlov «razı degilim» dep özü yazğan olsa, rusça biledir, dep ayttı.
Hatırlatamız, sentâbrniñ 17-nde Aqmescitniñ Kiyev rayon mahkemesi sentâbrniñ 4-nde FSB binası ögünde «teşkil etilmegen toplaşuvnıñ» yedi iştirakçisine 117 biñ rublege cöreme ödetti.
Rusiye polisi sentâbrniñ 4-nde FSB binası ögünde tutulğan qırımtatarlarğa qarşı 58 memuriy protokol tizdi.
Reşat Belâlov Bağçasaraydaki ekinci «Hizb ut-Tahrir davası» boyunca 18 yılğa üküm etilgen Memet Belâlovnıñ babası ola.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
Rusiyeniñ Rostov-na-Donu Cenübiy okrugınıñ arbiy mahkemesi 2020 senesi sentâbr ayında Bağçasaraydaki ekinci «Hizb ut-Tahrir davası» boyunca üküm çıqardı.
Ukraina prezidenti Volodımır Zelenskıynıñ temsilciligi Bağçasaraydaki ekinci «Hizb ut-Tahrir davasınıñ» ükmüni «arbiy cinayet» dep adlandırdı. Reintegratsiya nazirligi, qırımtatarlarğa qarşı çıqarılğan üküm sebebinden Rusiyege qarşı sanktsiyalarnı sertleştirmege talap etecek, dep bildirdi.
Qırım Muhtar Cumhuriyeti ve Aqyar prokuraturası Bağçasaraydaki «Hizb ut-Tahrir davasınıñ» mabüslerine qarşı çıqarılğan ükümni Qırımdaki diniy taqiplerniñ delili dep adlandırdı.
2020 senesi oktâbrniñ 6-nda bu dava boyunca üküm etilgenler Rostov-na-Donu SİZO-5-ne etap etildi. Dekabr ayında Bağçasaraydaki ekinci «Hizb ut-Tahrir davasınıñ» yedi mabüsi Rostov-na-Donu tahqiqat izolâtorından Novoçerkassk SİZO-3-ne avuştırıldı.