Aksönov, Qırım vitse-premyeriniñ işten çıqaruvını ve yañısınıñ vazifege tayinlemesini tasdıqladı
Qırımnıñ rusiyeli başı Sergey Aksönov, vitse-premyer Mihail Seleznöv istifağa ariza bergenini ve onıñ yerine Qırım memurı Yuliya Jukova teklif etilecegini tasdıqladı. Bunıñ aqqında o Facebookta yazdı.
“Muaviniñ Mihail Borisoviç Seleznövniñ öz isteginen işten ketmek arizasını imzaladım. Onıñ istifası aileviy sebeplernen bağlı. Beraberlikte yapılğan iş içün Mihail Borisoviçke minnetdarım. Onıñ yerine ise Yuliya Mihaylovna Jukovanıñ namzetini teklif etem. Şimdi o, Qırım cumhuriyetiniñ mesken nezareti İnspektsiyasınıñ başıdır. Bu mesele Devlet şurasınıñ eñ yaqın sessiyasında rey berüvge qoyulacaq”, - dep yazdı Aksönov.
Daa evel Qırım matbuatı, rusiyeli akimiyeti başınıñ muavini Mihail Seleznöv istifağa ariza bergeni aqqında bildire edi.
Mihail Seleznöv Qırım vitse-premyeri vazifesini 2018 senesi iyül ayından becere edi.