"Деҳи ман як пораи хоки Ватан". Эълони ғолибони озмуни Радиои Озодӣ. ВИДЕО

Ҷоизаҳои озмуни Радиои Озодӣ барои беҳтарин видеои корбарон зери унвони “Деҳи ман як пораи хоки Ватан” соҳибони худро пайдо кард. Корбарони Радиои Озодӣ ба ин озмун видеоҳои зиёде фиристоданд, вале танҳо 24 навор ба озмун роҳ ёфт. 

Дар маросими натиҷагирӣ аз ин озмун, ки рӯзи 19-уми сентябр дар Душанбе баргузор шуд, се навори беҳтарин эълон ва ба муаллифони онҳо ҷоизаҳои арзишманд тақдим шуд.

Ҷоизаҳоро ба пирӯзмандон Сафар Ҳақдодов, раиси Иттиҳоди синамогарони Тоҷикистон, Орзу Исоев, рӯзноманигор ва филмноманавис ва Моҳпайкар Ёрова ҳунарпешаи синамо тақдим карданд.

Шоҳҷоизаи озмуни "Деҳи ман як пораи хоки ватан"-ро Файзалӣ Сафаров, блогери ҷавон аз ноҳияи Сангвор соҳиб шуд. Файзалӣ Сафаров сокини 35-солаи деҳаи Лайрони Боло дар навори кӯтоҳ ба як шакли ҷолиб ва ҳам бодард дар бораи деҳаи худ ва мушкилоти он қисса кардааст. Ин блогер аз ҷумла манзараи сохтани пули муваққатиеро нишон додааст, ки одамон аз он ба самти дигари дарё мегузаранд.

Зимнан Файзалӣ дар шабакаи Ютуб саҳифаи худро дорад ва наворҳои ин блогери тоҷик дар бораи ҳаёти сокинони деҳ ва ҷонварони нодир пурбинанда ҳам ҳаст. Файзалӣ барои навори беҳтарин дар озмуни Радиои Озодӣ соҳиби видеокамера шуд. Ин блогер дар сӯҳбат бо Радиои Озодӣ гуфт, аз ин ба баъд наворҳои ӯ дар саҳифааш дар Ютуб беҳтар мешавад.

Гузориши видеоӣ дар ин ҷост: 

"Ман аслан ба сабти наворҳои деҳа баъди бозгашт аз муҳоҷират оғоз кардам. Дар муҳоҷират ҳамеша ёди ватан мекардам. Он ҷо тасмим гирифтам, ки вақте баргаштам, ин корро ба роҳ мемонам. Аз озмун интизори ҷойи аввал надоштам, аммо ҳаракат кардам," -- гуфт Файзалӣ, ғолиби озмуни Радиои Озодӣ.

Ҷоизаи дувуми озмуни Радиои Озодӣ – "Деҳи ман як пора хоки ватан" насиби Фурӯзонфар Искандаров, барои навори “Деҳи ман: Табушн дар ноҳияи Кӯҳистони Мастчоҳ” шуд. Ин видео аз ҷониби доварони озмун барои наворбардории касбӣ ва ҷолиб баҳои баланд гирифт. Бархе аз доварон ҳам бо шубҳа мегуфтанд, эҳтимол наворҳо аз ягон расонае гирифта шудаанд ё муаллиф наворбардори касбӣ аст.

Аммо Фурӯзонфар, ки дар маросими натиҷагирӣ аз озмуни Радиои Озодӣ ширкат дошт, гуфт, ӯ омӯзгори забони англисӣ аст ва сабти наворҳо аз манзараҳои зебо як шуғли дӯстдоштааш мебошад. Фурӯзонфар барои ин навор дар озмуни "Деҳи ман як пораи хоки ватан" соҳиби планшет шуд. "Соли 2016 ман бо 6 забон филми ҳуҷҷатиеро дар бораи деҳаи Табушн омода карда, дар Ютуб гузоштам. Ман на барои ҷоиза, балки аз рӯйи завқу муҳаббат деҳи худро муаррифӣ кардам. Ин кори осон нест. Барои як кадри оҳуро дар болои кӯҳ ба навор гирифтан, даҳ километр роҳ рафтам, ба болои кӯҳ баромадам. Як шаб хоб рафта, пагоҳ ҳамон ҳолатро пайдо ва сабт кардам," -- афзуд Фурӯзонофар Искандаров.

Ҷойи саввум дар озмуни "Деҳи ман як пора хоки ватан" аз миёни номзадҳои хеле зиёд ба як духтари донишҷӯ барои беҳтарин навор аз ноҳияи дурдасти Ишкошим сазовор дониста шуд. Доварони озмун ҳангоми арзёбиҳо ба навори Амрина Абдулназарова, ҷойгоҳи махсус доданд.

Амрина дар сӯҳбат бо Радиои Озодӣ гуфт, наворро дар таътили тобистонаи худ сабт карда фиристод. Ӯ дар ин озмун соҳиби як телефон шуд. Амрина мегӯяд, мехост, ҷойи аввал аз ӯ шавад ва барои хоҳараш, ки низ ба аксу наворбардорӣ майли зиёд дорад, дурбин тӯҳфа кунад.

Озмуни "Деҳи ман як пораи хоки ватан" моҳи июн аз тарафи Радиои Озодӣ эълон шуд. Хоҳишмандон мебоист дар як навори 1-дақиқагӣ деҳаи худро ба ҷаҳониён нишон медоданд. Аз табиат, одамон, зиндагӣ, мушкилот -- ҳама чизи аҷоиби деҳаи худ нақл мекарданд. Навор бояд ба чанд суол посух мегуфт. Аз ҷумла инки чаро ҷаҳониён бояд деҳаи шуморо бубинанд? Чаро ба он таваҷҷуҳ зоҳир кунанд? 

Ҳайати доварони озмун, ҳам ки 13 нафар буданд, ин наворҳоро дар чаҳорчӯби шартҳои эълоншуда арзёбӣ карданд. Онҳо ба ҳар навор аз рӯйи чанд меъёр аз ҷумла дарозои навор, шеваи ҷолиби тасвир аз деҳаи худ, интихоби манзараҳо, пайванди сухан ва тасвир, самимияти нақл ва аҳамияти иҷтимоии навор холгузорӣ карданд.

Доварони озмун аз миёни намояндагони касбу кори гуногун, аз ҷумла филмсозону хабарнигорон ва блогерҳо интихоб шуда буданд. Сафар Ҳақдодов, раиси Иттиҳоди синамогарони Тоҷикистон ва раиси ҳайати доварон ҳангоми суханронӣ гуфт, зимни баҳогузорӣ бештар ба маҳорати наворбардорӣ ва муҳтавои видео аҳамият додааст. Ҳақдодов баргузор кардани чунин озмунҳоро кумаке барои ба миён омадани наворбардорони ҳирфаӣ номид.

Салими Аюбзод, кафили мудирияти Бахши тоҷикии Радиои Озодӣ дар маросими эълони барандаҳои озмуни "Деҳи ман як пораи хоки Ватан" гуфт, ҳадаф аз ташкили озмун ҷалби ҷавонон ва видеоблогерҳои мардумӣ барои нишон додани зиндагӣ дар деҳоти имрӯзаи Тоҷикистон буд.

"Агар дар гузашта мегуфтанд, тоҷикон табиатан шоиранд, ҳоло бояд бигӯем, тоҷикон табиатан филмсозанд. Мо мебинем, дар паҳнои Ютуб чӣ қадар наворҳои зиёде аз ҷавонон нашр мешаванд. Аммо мавзуъҳои мухталифу камаҳамиятанд. Мо бо ин озмун мехоҳем ба онҳо бигӯем, ки бояд аз дунболи мавзӯъҳое раванд, ки арзиши иҷтимоӣ ва бинанда доранду мушкилеро ҳал мекунанд," -- афзуд Салими Аюбзод.