ИИМ: Сегиз айда жолдогу кырсыктардан 379 адам каза болду
2022-жылдын сегиз айында жол кырсыктарынан 379 киши каза болду. Бул тууралуу Жогорку Кеңештин тийиштүү комитетинин жыйынында Жол кыймылынын коопсуздугун камсыз кылуу башкармалыгынын башчысы Азамат Исраилов билдирди. Ал быйылкы сегиз айда жол кырсыктары 9 пайызга жакын, андан каза болгондордун саны 31,3% азайганын кошумчалады.
Парламенттин Укук тартиби, кылмыштуулук менен күрөшүү жана коррупцияга каршы аракеттенүү боюнча комитети бүгүн, 4-октябрда жол кыймылынын коопсуздугун камсыздоого байланышкан айрым мыйзам актыларына өзгөртүүлөрдү киргизүүнү карады.
Өткөн жылы жол кырсыктардан 8 миңдей киши ар кандай жараат алган. Алардын 1,5 миңи жаш балдар. Жалпысынан 600гө жакын киши жолдогу кырсыктарда каза болсо, алардын 80и балдар. (КЕ)