Шымкент ауруханасында медбикенің зорлануы: дәрігер ақталып шықты
Шымкентте жұмыс орнында медбикені зорлады деп айыпталған дәрігер ақталып шықты, - деп хабарлайды Tengrinews.kz тілшісі.
Бұл туралы Шымкенттегі әл-Фараби аудандық сотының судья-координаторы Сәбит Төреханов редакцияның ресми сауалына жауап берді. Оның айтуынша, сот жабық режимде өткен.
"Сот үкімімен айыпталушы "Зорлау" және "Сексуалдық сипаттағы зорлық-зомбылық әрекеттері" баптары бойынша кінәсіз деп танылды. Оған тағылған айыптардың дәлелденбеуіне байланысты ол ақталып шықты", - деді Сәбит Төреханов.
Оның айтуынша, айыпталушы өзіне тағылған айыптармен келіспеген. Тергеу барысында заттай деректер табылмаған және сот-медициналық сараптамасы мен бес куәгер зардап шеккен әйелдің сөздерін растамаған.
"Осы істі жүргізген тергеушінің тарапынан көптеген заңбұзушылық болғаны және Шымкент ПД басшысының атына қызметтік тергеу жүргізу туралы шешім шығарылды", - деді судья.
Сот үкімі заңды күшіне енген жоқ.