ქუთაისში კორონავირუსის რვა ახალი შემთხვევა დადასტურდა

ე.წ. პედაგოგების კლასტერი გაფართოვდა ქუთაისში. 11 სექტემბერს საღამოს მონაცემებით, კიდევ 8 ადამიანს დაუდასტურდა COVID  - 19 და ინფიცირებულთა რაოდენობამ 36-ს მიაღწია. პაციენტები ქალაქის ერთ-ერთი საჯარო სკოლის პედაგოგების ახლობლები და ნათესავები არიან. იმერეთის მხარეში სახელმწიფო რწმუნებულის ზვიად შალამბერიძის თქმით, „ახლად გამოვლენილი შემთხვევების ყველა კონტაქტი და პირველწყარო ცნობილია“.

შალამბერიძის განცხადებით, დასრულდა ინტერვენციული მედიცინის ცენტრის პერსონალის კვლევა  და ყველა პასუხი უარყოფითია. კლინიკის რეანიმაციის ექიმს კორონავირუსი გეგმური შემოწმებისას დაუდასტურდა.

გუბერნატორის ინფორმაციით, 11 სექტემბრის დილიდან ქუთაისის ბულვარში გაშლილ კარავში განთავსებულ ლაბორატორიას  PCR-კვლევისთვის 300-მდე ადამიანმა მიმართა. კორონავირუსით დაინფიცირების მაღალი მაჩვენებელის დადასტურების შემდეგ მოქალაქეთა უფასო ტესტირების გადაწყვეტილება მიიღო ხელისუფლებამ.

ქუთაისში 11 სექტემბრის დილის მონაცემებით დადასტურებული 28 შემთხვევიდან კი 20-ზე მეტი სკოლის პედაგოგია.