რობერტ ო’ბრაიენი: ჩემთვის უცნობია დაზვერვის ცნობა ტრამპის სასარგებლოდ რუსეთის ჩარევაზე
აშშ-ის პრეზიდენტის თანაშემწე ეროვნული უშიშროების საკითხებში, რობერტ ო’ ბრაიენი, აცხადებს, რომ მას არ უნახავს სადაზვერვო ინფორმაცია, დონალდ ტრამპის ხელმეორედ არჩევის მიზნით რუსეთის მხრიდან მომავალ საპრეზიდენტო არჩევნებში ჩარევის შესახებ.
პრეზიდენტის თანაშემწეს ეროვნული უშიშროების საკითხებში საკმაოდ კარგად მიუწვდება ხელი ჩვენი დაზვერვის ინფორმაციებზე და „მე არ მინახავს არავითარი სადაზვერვო ინფორმაცია იმის თაობაზე, თითქოს რუსეთი მოქმედებდეს დონალდ ტრამპის ხელმეორედ არჩევის მცდელობის მიმართულებით“, - განაცხადა რობერტ ო’ ბრაიენმა.
თეთრი სახლის მაღალჩინოსნის ამ განცხადების ფონია წინა დღით რამდენიმე წამყვან ამერიკულ გამოცემაში ანონიმურ სადაზვერვო წყაროებზე დაყდნობით გამოქვეყნებული ცნობები, რომელთა თანახმად რუსეთი ცდილობს ჩაერიოს არჩევნების პროცესში დემოკრატების ერთ-ერთი სავარაუდო კანდიდატის, ბერნი სანდერსისა და პრეზიდენტ დონალდ ტრამპის სასარგებლოდ.
პრეზიდენტმა დონალდ ტრამპმა ამ ცნობას უწოდა დემოკრატების მიერ წამოწყებული დეზინფორმაციის კიდევ ერთი კამპანია.
ბერნი სანდერსმა დაგმო რუსეთის მცდელობა, ჩაერიოს 2020 წლის საპრეზიდენტო არჩევნებში მისი კამპანიის სასარგებლოდ და „ბანდიტი“ უწოდა რუსეთის პრეზიდენტს ვლადიმირ პუტინს.
„გულახდილად ითქვას, არ მადარდებს, თუ ვისი პრეზიდენტად გახდომა სურს [ვლადიმირ პუტინს]. ჩემი მესიჯი პუტინისადმი მკაფიოა: ხელები შორს აშშ-ის არჩევნებისგან და ამას მისგან მე მივაღწევ, როგორც პრეზიდენტი“, - განაცხადა ვერმონტში ამომრჩევლებთან შეხვედრის დროს 78 წლის ბერნი სანდერსმა.