ილია მეორე: 42 წელია მე ვარ სამიზნედ
„ხალხის თანადგომა რომ არ იყოს, მე ვერ გავუძლებდი ამ სიმძიმეებს. 42 წელია მე ვარ სამიზნედ. ღმერთი გვიცავს, ღმერთი გვაძლევს მადლს და ძალას, რომ გავუძლოთ“, - განაცხადა საქართველოს კათოლიკოს- პატრიარქმა ილია მეორემ თიანეთისა და ფშავ-ხევსურეთის ეპისკოპოსის მიქაელისა და ეპარქიის წარმომადგენლებთან შეხვედრაზე.
საქართველოს საპატრიარქოს თანახმად, შეხვედრა 21 თებერვალს გაიმართა და მასში მონაწილეობდნენ ასევე თიანეთის მუნიციპალიტეტის მერი თამაზ მეჭიაური და მწერლები ბესიკ ხარანაული და ტარიელ ხარხელაური.
საპატრიარქოს მიერ გავრცელებული ინფორმაციით, საპატრიარქოში მისულმა სტუმრებმა მთაში მცხოვრებთა სახელით პატრიარქს თანადგომა და მხარდაჭერა გამოუცხადეს და აღნიშნეს, რომ სათემო და საგვარეულო კავშირებს დიდი წვლილი შეაქვთ ძველი ეკლესია-მონასტრების აღდგენასა და აღორძინებაში.