ათეულობით ქვეყნის ლიდერები იერუსალიმში შეიკრიბნენ ოსვენციმის ბანაკის განთავისუფლების წლისთავის აღსანიშნავად
„ჰოლოკოსტის მსოფლიო ფორუმზე“ ჩასულ, 40-ზე მეტი ქვეყნის წარმომადგენელთა შორის არიან რუსეთის პრეზიდენტი, ვლადიმირ პუტინი, საფრანგეთის პრეზიდენტი, ფრანსუა მაკრონი, ბრიტანეთის პრინცი ჩარლზი, აშშ-ის ვიცე-პრეზიდენტი, მაიკ პენსი და გერმანიის, იტალიის და ავსტრიის პრეზიდენტები. მათი მიზანია ჰოლოკოსტის წლისთავის აღნიშვნა და თანამედროვე ანტისემიტიზმთან ბრძოლა.
პოლონეთის პრეზიდენტმა, ონჯეი დუდამ არ ისურვა იერუსალიმში ჩასულიყო, რადგან მას უარი უთხრეს, სიტყვით გამოსულიყო შეხვედრაზე, რომელზეც შეკრებილებს მიმართავენ რუსეთის, საფრანგეთის, ბრიტანეთის, აშშ-ის და გერმანიის წარმომადგენლები. შეხვედრის ისრაელმა ორგანიზატორებმა განაცხადეს, რომ მეორე მსოფლიო ომში მოკავშირეებს და გერმანიას მიეცემათ სიტყვით გამოსვლის შესაძლებლობა.
პოლონეთი, რომელიც განაწყენებულია პუტინის განცხადებით, რომ პოლონეთმა უნდა გაიზიაროს ომის პასუხისმგებლობა, საბჭოთა ჯარის მიერ ოსვენციმის ბანაკის განთავისუფლების წლისთავისადმი შეხვედრებს თვითონაც გამართავს 27 იანვარს, პოლონეთში, უშუალოდ ოსვენციმში, მემორიალურ მუზეუმში, სადაც საკონცენტრაციო ბანაკი, აუსშვიც-ბირკენაუ მდებარეობდა ნაცისტური ოკუპაციის დროს.
ოსვენციმის საკონცენტრაციო ბანაკში მილიონამდე ადამიანი იქნა მოკლული, უმეტესად ებრაელები. სულ ჰოლოკოსტს ექვსი მილიონი ებრაელი ემსხვერპლა.