რუსეთის საოკუპაციო რეჟიმმა დევნილთა დაბრუნების საკითხის განხილვას კვლავ დემარშით უპასუხა
ჟენევის საერთაშორისო დისკუსიის 46-ე რაუნდზე რუსეთის და მის მიერ ოკუპირებული აფხაზეთის და ცხინვალის რეგიონების დე ფაქტო მთავრობების წარმომადგენლებმა კვლავ უარი თქვეს დევნილთა დაბრუნების საკითხის განხილვაზე. „რუსეთისა და მისი საოკუპაციო რეჟიმების წარმომადგენელთა დესტრუქციული პოზიციის გამო, ვერ მოხერხდა დღის წესრიგის ერთ-ერთი მთავარი თემის - ეთნიკური წმენდის შედეგად აფხაზეთისა და ცხინვალის რეგიონებიდან იძულებით გადაადგილებულ პირთა და ლტოლვილთა უსაფრთხო და ღირსეული დაბრუნების საკითხის განხილვა. აღნიშნულ თემაზე დისკუსიის თავიდან აცილების მიზნით, მონაწილეებმა მოსკოვიდან, სოხუმიდან და ცხინვალიდან დატოვეს მოლაპარაკებები” - ნათქვამია საქართველოს საგარეო საქმეთა სამინისტროს განცხადებაში.
საგარეო საქმეთა სამინისტროს ინფორმაციით, ორდღიან შეხვედრაზე თბილისის დელეგაციამ ვრცლად ისაუბრა რუსეთის მიერ აფხაზეთისა და ცხინვალის რეგიონების ოკუპაციისა და ფაქტობრივი ანექსიის მძიმე შედეგებზე ადგილობრივი მოსახლეობისთვის, რუსეთის მიერ საქართველოს ოკუპირებული ტერიტორიების მილიტარიზაციის პროცესზე, გახშირებულ სამხედრო წვრთნებზე, საქართველოს საჰაერო სივრცის დარღვევის ფაქტებსა და მავთულხლართებით საოკუპაციო ხაზის გამაგრებაზე. ქართულმა მხარემ დაგმო სოფელ ატოცთან ხელოვნური ბარიერების აღმართვის უკანონო პროცესი. თბილისის დელეგაციამ კვლავ მოითხოვა რუსეთის მიერ 2008 წლის 12 აგვისტოს ცეცხლის შეწყვეტის შეთანხმების სრულად შესრულება, მოსკოვის მიერ ძალის არგამოყენების ვალდებულების დადასტურება და ოკუპირებულ რეგიონებში უსაფრთხოების საერთაშორისო მექანიზმების შექმნა.
საგარეო საქმეთა სამინისტროს ცნობითვე, თბილისის დელეგაციამ განსაკუთრებული აქცენტი გააკეთა დავით ბაშარულის, გიგა ოთხოზორიას და არჩილ ტატუნაშვილის მკვლელობის ფაქტებსა და მართლმსაჯულების აღსრულების აუცილებლობაზე. სამინისტროს ინფორმაციით, ვრცლად იქნა განხილული აფხაზეთისა და ცხინვალის რეგიონებსა და საოკუპაციო ხაზის მიმდებარე ტერიტორიებზე მცხოვრები მოსახლეობის უფლებრივი მდგომარეობა. საუბარი შეეხო თავისუფლად გადაადგილების, მშობლიურ ენაზე განათლების მიღების, საკუთრებისა და სხვა ფუნდამენტური უფლებების დარღვევას. განსაკუთრებული განხილვის საგანი იყო გალისა და ახალგორის ქართველი მოსახლეობის ეთნიკური დისკრიმინაციის მძიმე შედეგები და ამ გამოწვევის დაუყოვნებლივ გადაჭრის აუცილებლობა. საქართველოს საგარეო საქმეთა სამინისტროს განცხადებით, ხაზი გაესვა რუსეთის ფედერაციის, როგორც ოკუპირებულ ტერიტორიებზე ეფექტური კონტროლის განმახორციელებელი ძალის პასუხისმგებლობას და გალისა და ერგნეთის შეხვედრების დროულად და ფუძემდებლური პრინციპების დაცვით აღდგენის აუცილებლობას. ჟენევის საერთაშორისო დისკუსიების 46-ე რაუნდი 11-12 დეკემბერს ჩატარდა. მომდევნო რაუნდი 2019 წლის 2-3 აპრილს გაიმართება.