Օրենքի փոփոխության դեպքում մինչև 1000 աջ ղեկով մեքենա կարող է ՀՀ տարածք ներմուծվել. Հակոբ Արշակյան
ԱԺ արտահերթ նիստում քննարկվում է «Աջակողմյան ղեկային տեղաբաշխմամբ տրանսպորտային միջոցների ներմուծումն արգելելու մասին» օրենքում փոփոխություններ կատարելու մասին հարցը:
Հիմնական զեկուցող, ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը նշեց, որ առաջարկվող փոփոխություններով հնարավորություն կընձեռվի մաքսային տարածքներում տեղակայված աջ ղեկով տրանսպորտային միջոցները, ինչպես նաև այն մեքենաները, որոնց ձեռքբերման համար վճարումները կատարվել են մինչև 2018 թվականի դեկտեմբերի 30-ը, ՀՀ տարածք ներմուծել մինչև 2019 թ.-ի մայիսի 1-ը:
ԱԺ պատգամավոր Տաթևիկ Հայրապետյանը հետաքրքրվեց, թե հայտնի է, թե որքան մեքենայի մասին է խոսքը, և հնարավո՞ր է՝ նշված ժամկետում հասցնեն բերել: Նախարար Արշակյանը պատասխանեց, որ խոսքը մինչև 1000 մեքենայի մասին է: Նա ասաց, որ ի սկզբանե որևէ չափելի թիվ չեն ունեցել, և օրենքը չէին ընդունում ռիսկերից խուսափելու համար, բայց նախաձեռնության անդամները բերել են մեքենաների ցուցակը՝ իրենց պին կոդերով, և կառավարությունը հաշվարկել է չափելի ռիսկայնությունը և ապահովում է թողունակությունը:
ԱԺ տնտեսական հարցերի մշտական հանձնաժողովի նախագահ Բաբկեն Թունյանն էլ նկատեց, որ առաջարկվող փոփոխություններով խորհրդարանը հերթական անգամ ընդառաջ է գնում քաղաքացիներին:
Անդրադառնալով ԲՀԿ-ական պատգամավոր Գևորգ Պետրոսյանի առաջարկին՝ մեկ ամսով երկարաձգել սահմանվող ժամկետը՝ Թունյանը նշեց. «2018-ի ապրիլից առ այսօր արդեն բավականին ժամանակ է անցել, ու մարդիկ պետք է, որ տեղեկացված լինեին այդ մասին, որևէ երաշխիք չկա, որ եթե հիմա հետաձգենք, ապա վաղը նույն բանը չեն անի: Ուզում եմ ֆիքսել, որ մեր քաղաքացիների հետ գալիս ենք համաձայնության, ու սրանից հետո, երբ ասում ենք՝ օրենքի չիմացությունը պատասխանատվությունից չի ազատում, պետք է փորձենք այդ դրույթին հետևել:
Մենք մեր կողմից ու կառավարությունն էլ իր կողմից պետք է ամեն ինչ անենք, որ պատշաճ իրազեկում իրականացվի, բայց լավ կլինի, որ մեր համաքաղաքացիներն էլ ցանկացած գործունեություն իրականացնելուց առաջ մի փոքր հետաքրքրվեն, թե այդ դաշտում ինչ իրավակարգավորումներ են գործում», - ասաց Թունյանը: Նա նաև ընդգծեց, որ օրենքի փոփոխությունը հրատապ ռեժիմով սահմանում կուտակված մոտ 1000 մեքենայի խնդիր կլուծի: