ՎԶԵԲ-ն ընդլայնում է Հայաստանում կանաչ ֆինանսավորման ծավալները և մրցանակներ է շնորհում կայուն էներգետիկայի լավագույն ծրագրերին

·     ՎԶԵԲ-ը և Կանաչ կլիմայի հիմնադրամը պաշտոնապես հայտարարում են Հայաստանում նոր GEFF ծրագրի մեկնարկի մասին, որը շարունակելու է աջակցել կանաչ տեխնոլոգիաների ներդրումների տարածմանը

·     Ամերիաբանկը առաջին բանկն է, որը ստացել է ՎԶԵԲ-ի էներգաարդյունավետության վարկային գիծ

·     ԱրմՍվիսԲանկը ծրագրին միացող երկրորդ բանկն է, որին տրամադրվել է 2.5 միլիոն Եվրո էներգաարդյունավետության վարկավորում՝ ՓՄՁ-ներին և բիզնեսներին ենթավարկեր տրամադրելու նպատակով

·     ԵՄ-ի ու Ավստրիայի կողմից ֆինանսավորված ՎԶԵԲ-ի Էներգոկրեդիտ ծրագիրը մրցանակներ է շնորհել կյանքի կոչված էներգաարդյունավետ ներդրումների համար

Հայաստանում էներգաարդյունավետության բարձրացմանն ուղղված ջանքերը առավել խորացնելու նպատակով, ՎԶԵԲ-ը մեկնարկում է Կանաչ տնտեսության ֆինանսավորման նոր ծրագիր, որը համաֆինանսավորվում է Կանաչ կլիմայի հիմնադրամի (ԿԿՀ) կողմից:

ԱրմՍվիսԲանկին տրամադրված 2.5 միլիոն Եվրո վարկավորումից կարող են օգտվել փոքր և միջին ձեռնարկությունները (ՓՄՁ-ներ) և կորպորատիվ ընկերությունները: ԱրմՍվիսԲանկը GEFF-ի ծրագրին միացող երկրորդ բանկն է, Ամերիաբանկի վարկային գծի հաջողակ մեկնարկից հետո: Ֆինանսավորումը հասանելի կլինի կանաչ տեխնոլոգիաների ներդրումների, մասնավորապես կլիմայի փոփոխությանն ադապտացման և մեղմացմանն ուղղված տեխնոլոգիաների համար: Հնարավոր ներդրումներն են՝ ջերմամեկուսացման համակարգերը, ֆոտովոլտայիկ արևային վահանակները, երկրաջերմային տաքացման պոմպերը և արդյունավետ ոռոգման համակարգերը: Գործարարները կարող են GEFF-ի Տեխնոլոգիաների ցանկից փնտրել և գտնել Հայաստանում հասանելի կանաչ տեխնոլոգիաները:

Կանաչ տեխնոլոգիաներում ներդրումներ կատարող ընկերությունները կարող են նաև հավակնել Կլիմայի ներդրումային հիմնադրամի (ԿՆՀ) կողմից ֆինանսավորվող պարգևավճար ստանալուն: GEFF-ը ներառում է համապարփակ տեխնիկական խորհրդատվական փաթեթ, որը համաֆինանսավորվում է ԿԿՀ-ի կողմից: Տեխնիկական խորհրդատվությունը աջակցում է կանաչ ներդրումների հնարավորությունների բացահայտման ու գնահատման գործընթացում:

Փետրվարի 19-ին, Երևանում  տեղի ունեցավ Հայաստանում GEFF-ի նոր ծրագրի պաշտոնական մեկնարկի միջոցառումը, որին ներկա էին GEFF-ի բոլոր շահառուները՝ դոնորներ, պետական պաշտոնյաներ, տեղական գործընկեր ֆինանսական կառույցներ, կանաչ տեխնոլոգիաների արտադրողներ և մատակարարներ: ՎԶԵԲ-ի ներկայացուցիչ, Հայաստանի գրասենյակի ղեկավար Դիմիտրի Գվինդաձեն իր խոսքում նշեց, որ «Հայաստանում մեր հիմնական առաջնահերթություններից են ֆինանսական ոլորտի զարգացումը և կանաչ ֆինանսավորման հասանելիությունը: Ուրախ ենք համագործակցել Ամերիաբանկի և ԱրմՍվիսԲանկի հետ՝ նպաստելով էներգաարդյունավետ և ջրի արդյունավետ օգտագործման ներդրումների ծավալների ընդլայնմանը: Այսօր, համագործակցություն հաստատելով ԱրմՍվիսբանկի հետ, որը հայտնի է որպես կայացած հաճախորդների բազա ունեցող բանկ, առավել արդյունավետ կերպով կարող ենք հասնել մասնավոր հատվածի ներկայացուցիչներին, ինչպես Երևանում, այնպես էլ մարզերում»:

Պաշտոնական մեկնարկի ժամանակ, ՎԶԵԲ-ը մրցանակներ է շնորհել Հայաստանում լավագույն էներգաարդյունավետ և վերականգնվող էներգիայի ներդրումներ կատարած ընկերություններին, ՎԶԵԲ-ի Էներգոկրեդիտ ծրագրի շրջանակներում:

Մրցանակները շնորհվել են լավագույն 6 էներգաարդյունավետ ծրագրերին, որոնք նպաստել են Հայաստանում ածխաթթու գազերի արտանետումների զգալի կրճատմանը, ինչպես նաև 7 ֆինանսական կազմակերպություններին՝ կանաչ ներդրումների աջակցության համար:

Էներգոկրեդիտ 2019 մրցանակաբաշխության հաղթողներ են ճանաչվել՝

«Լավագույն ազդեցություն» անվանակարգում մրցանակ է շնորհվել հետևյալ ընկերություններին՝

·     «Արմյանսկիյ ուրաժայ» ՍՊԸ ,

·     «Գրանդ սպորտ» ՍՊԸ,

·     «Լենտեքս» ՍՊԸ,

·     «Հիտեքս պլաստիկ» ՓԲԸ,

·      «Մասիս թռչնաբուծական ֆաբրիկա» ՓԲԸ,

·     «Արմսվիթ»:

«Փոփոխության գործակալ» անվանակարգի մրցանակները շնորհվել են ՝

·     Ամերիաբանկին` ջերմոցային տնտեսությունում կանաչ ներդրումների աջակցության համար

·     ԱԿԲԱ Լիզինգին` վերականգնվող էներգիայի ներդրումների աջակցության համար 

·     Ինեկոբանկին` տեքստիլի ոլորտում կանաչ ներդրումների աջակցության համար

·     ԱԿԲԱ-Կրեդիտ Ագրիկոլ բանկին՝ բնակարանային ոլորտում կանաչ ներդրումների աջակցության համար

·     Էյչ-էս-բի-սի բանկին՝ փաթեթավորված ապրանքների ոլորտում կանաչ ներդրումների աջակցության համար

·     ԱրմՍվիսԲանկին՝ սննդի ոլորտում կանաչ ներդրումների աջակցության համար

·     ՍԵՖ ինտերնեյշնլ վարկային կազմակերպությանը՝ միկրոֆինանսավորման միջոցով կանաչ ներդրումների աջակցության համար:

GEFF-ը, որպես Էներգոկրեդիտ ծրագրի նոր փուլ, շարունակելու է նպաստել Հայաստանում կանաչ տնտեսության ստեղծմանը աջակցելով կանաչ ֆինանսավորման ընդլայնմանը համաձայն ՎԶԵԲ-ի «Անցում դեպի կանաչ տնտեսություն»  մոտեցման:

Հայաստանում 1992 թվականի հիմնադրումից մինչ օրս, ՎԶԵԲ-ը կատարել է 1.2 մլրդ եվրոյի ներդրում 168 նախագծերի իրագործման համար, որոնք ուղղվել են ֆինանսական, կորպորատիվ, ենթակառուցվածքային և էներգետիկայի ոլորտներին: Նշված ներդրումների 88%-ը ուղղվել են մասնավոր հատված:

2006 թվականից ՎԶԵԲ-ը 26 միլիարդ եվրո ներդրում է կատարել այն նախագծերի իրականացման համար, որոնք խթանում են անցումը դեպի կանաչ տնտեսություն իր գործունեության 38 երկրներում: