ԱՄՆ-ում ականատեսները նկարահանել են երիտասարդի՝ հրդեհվող ինքնաթիռից դուրս գալու պահը (լուսանկարներ, տեսանյութ)
ԱՄՆ-ի Միչիգան նահանգի Դետրոյթ քաղաքում կործանվել է Cessna 210 թեթև շարժիչով ինքնաթիռը, ինչի հետևանքով երկու մարդ է մահացել: Այս մասին հայտնում է The Daily Mail-ը:
Աղբյուրի հաղորդմամբ՝ Տեխաս նահանգի Հյուստոն քաղաքի բնակիչներ 54-ամյա Գրեգ Բոազն ու նրա կինը՝ 48-ամյա Ջուլի Բոազը, մեկնում էին Դետրոյթ՝ իրենց 14-ամյա դուստր Կրիստայի վոլեյբոլի խաղը դիտելու:
Նշվում է, որ աղետի պահին ինքնաթիռում է եղել նաև զույգի 17-ամյա որդի Պեյտոնը, որը ողջ է մնացել ու նույնիսկ կարողացել է ինքնուրույն դուրս գալ ինքնաթիռից: Ականատեսները նկարահանել են երիտասարդի՝ հրդեհվող ինքնաթիռից դուրս գալու պահը:
Տեսանյութում երևում է՝ ինչպես է ինքնաթիռը կործանվել տների մոտակայքում: Երիտասարդն արագ դուրս է եկել այնտեղից ու վազել օգնություն կանչելու: Դեպքի վայր է ժամանել շտապօգնությունը, որը հիվանդանոց է տարել երիտասարդին: Այժմ նա գտնվում է ծանր վիճակում:
Ինչպես նշել է Գրեգի զարմիկը՝ նա գնել էր այս ինքնաթիռն աղետից մի շաբաթ առաջ, սակայն ինքնաթիռ չէր վարել մոտ 10 տարի: