Դատարանը որոշում է Մանվել Գրիգորյանի խափանման միջոցը (լուսանկարներ, թարմացվում է)
16:10
Երևան քաղաքի ընդհանուր իրավասության դատարանի Ավանի և Նոր Նորքի նստավայրի դիմաց շարունակվում է ԵԿՄ նախագահ, ԱԺ պատգամավոր Մանվել Գրիգորյանին ազատ արձակելու պահանջով բողոքի ակցիան: Խափանման միջոցի որոշման նիստն արդեն մեկնարկել է:
Բողոքի ակցիային մասնակցում է նաև Մանվել Գրիգորյանի կինը՝ ազատամարտիկ Նազիկ Ամիրյանը:
Վերջինս դիմեց նրանց, ովքեր այս գործընթացների նկատմամբ անտարբեր են կամ բացասական մեկնաբանություններ են կատարում իրենց պայքարի վերաբերյալ:
«Միևնույնն է, որ հանկարծ սահմանին մի բան լինի, էլի այստեղ կանգնած մարդիկ են գնալու, երևի դուք չեք գնալու, անգլուխ տուն չի լինում: Մեր կամքը չեք կոտրի, այս տղաններն արյուն են տեսել»,-շեշտեց նա:
15:35
Մանվել Գրիգորյանի խափանման միջոցի որոշման նիստը դեռ չի մեկնարկել:
Tert.am-ի հետ զրույցում ԵԿՄ մամուլի խոսնակ Վարդան Վարդանյանն ասաց, որ Մանվել Գրիգորյանը դատարան չի բերվել, դատարանը դեռ նրա ներկայությունն ապահովելու միջնորդությունը չի քննարկել:
15:05
Երևան քաղաքի ընդհանուր իրավասության դատարանի Ավանի և Նոր Նորքի նստավայրի դիմաց շարունակվում է ԵԿՄ նախագահ, ԱԺ պատգամավոր Մանվել Գրիգորյանին ազատ արձակելու պահանջով բողոքի ակցիան:
«Մենք փորձում ենք հավատալ, որ դատարանի որոշումը արդար կլինի, և Արցախի հերոս Մանվել Գրիգորյանն ազատության մեջ կլինի, մեզ թույլ չենք տալիս խոսել իրավապահների հետագա գործողությունների մասին. եթե զենք-զինամթերքի հետ կապված մեղադրանք է՝ թող քննեն, հասկանան, բայց թող խափանման միջոց միանգամից կալանավորումը չընտրեն: Զորավարը մերն է, մեր ազգինն է»,- նշում են բողոքի ակցիա իրականացնողները:
Tert.am -ի հետ զրույցում ԵԿՄ մամուլի խոսնակ Վարդան Վարդանյանը նշեց, որ իրենք տեղեկատվություն ունեն, որ Մանվել Գրիգորյանը բերվելու է խափանման միջոցի որոշման նիստին:
13:05
Այս պահին բողոքի ակցիա իրականացնող ԵԿՄ անդամները Երևան քաղաքի ընդհանուր իրավասության դատարանի Ավանի և Նոր Նորքի նստավայրի դիմաց սպասում են Մ. Գրիգորյանի խափանման միջոցի հարցով կայանալիք նիստին:
ԵԿՄ մամուլի խոսնակ Վարդան Վարդանյանն ասաց, որ նիստը պետք է կայանար ժամը 13:00-ին, սակայն այն հետաձգվել է, կայանալու է 15:00-ին:
«Փաստաբանը նաև միջնորդել է, որ նիստին մասնակցելու հնարավորություն ունենա գեներալ Մանվել Գրիգորյանը, դեռ չգիտենք՝ միջնորդությունը բավարարվել է, թե ոչ»,- ասաց նա:
11:50
ԱԱԾի դիմաց ընդհարում տեղի ունեցավ ցուցարարների և ոստիկանների միջև, ինչից հետո բողոքի ակցիայի մասնակիցները քայլերթ սկսեցին: Ցուցարարներն ընթանում են Երևանի կենտրոնական փողոցներով, նրանց պահանջը մեկն է՝ Մանվել Գրիգորյանի ազատ արձակումը: 
------------------------
Ազգային անվտանգության ծառայության դիմաց այս պահին ակցիա են իրականացնում ԵԿՄ անդամները, ձերբակալված գեներալ ԱԺ պատգամավոր Մանվել Գրիգորյանի մարտական ընկերները:
Այս մասին Tert.am-ին տեղեկացրեց ԵԿՄ մամուլի խոսնակ Վարդան Վարդանյանը:
«Ակցիայի մասնակիցներն անընդունելի են համարում ԵԿՄ վարչության նախագահ, ԱԺ պատգամավոր Մանվել Գրիգորյանի ձերբակալությունը: Նրանք պահանջում են, որ Արցախի հերոսին ազատ արձակեն»,- շեշտեց նա:
ԱԱԾ-ի դիմաց բողոքի ակցիա իրականացնողները Մանվել Գրիգորյանին առաջադրված մեղադրանքը շինծու են համարում:
Հիշեցնենք, որ երեկ ևս ԵԿՄ-ականներն ԱԱԾ-ի դիմաց բողոքի ակցիա էին իրականացրել, տեղի էր ունեցել բախում կարմիրբերետավորների և ազատամարտիկների միջև: