Վրացական փողոցում շենքի պայթյունի փաստի առթիվ հարուցվել է քրեական գործ. ոստիկանություն
Երևան քաղաքի Վրացական փողոցի 10 շենքի 4-րդ մուտքում տեղի է ունեցած պայթյունի փաստի առթիվ հարուցվել է քրեական գործ։
Այս մասին Tert.am-ի հետ զրույցում ասաց ՀՀ ոստիկանության ԶԼՄ-ների հետ կապի,վերլուծության և լրատվության բաժնի պետ Էդգար Ջանոյանը։
«Դեպքի առթիվ ոստիկանությունում հարուցվել է քրեական գործ ՀՀ քրեական օրենսգրքի 186-րդ հոդվածի 2-րդ մասի հատկանիշներով՝ անզգուշության հետևանքով առանձնապես խոշոր չափերի վնաս պատճառելը»,-ասաց նա։
Հիշեցնենք,որ Վրացական փողոցի 10 շենքի 4-րդ մուտքի բնակարաններից մեկում տեղի է ունեցել պայթյուն, ինչի հետևանքով փլուզվել են բնակարանի միջնապատերը և պատշգամբը ամբողջությամբ, վնասվել են 2-րդ, 3-րդ և 4-րդ հարկերի պատուհանները: Տարհանվել է 14մարդ։
Դեպքի վայրում փոխքաղաքապետ Կամո Արեյանը հարցին, թե ինչպես է լուծվելու ժամանակավոր կեցության հարցը, պատասխանեց, որ ակնադիտական առաջին դիտարկման փուլում խորհուրդ չեն տալիս, որ այս մուտքի բնակիչները շարունակեն ապրել այդ շենքում. «Եթե մարդկանց կյանքին վտանգ է սպառնալու, անթույլատրելի է այստեղ ապրելը, ուրեմն պետք է փորձենք կարգավորել ժամանակավոր կեցության հարցը՝ բարեկամների մոտ, եթե չունեն դրա հնարավորությունը, մենք վարչական շրջանի աշխատակիցների հետ մի բան կկազմակերպենք»։