Իրանը «շատ անհանգստացած է» Ադրբեջանում ահաբեկիչների ներկայությունից
«Իրանը շատ անհանգստացած է Ադրբեջանում ահաբեկիչների ներկայությունից և իր մտահոգությունը փոխանցել է պաշտոնական Բաքվին», - կեսգիշերն անց Երևանում «Ազատության» հետ զրույցում ասաց Իրանի արտգործնախարարի տեղակալ Աբբաս Արաղչին։
Արաղչին, ով միաժամանակ Իրանի նախագահ Հասան Ռոհանիի հատուկ բանագնացն է, երեկ աշխատանքային այցով ժամանել էր Երևան՝ ներկայացնելու ղարաբաղյան հակամարտության կարգավորման Թեհրանի առաջարկները, և ուշ երեկոյան նրան ընդունեց արտգործնախարար Զորհաբ Մնացականյանը։
«Ազատություն». - Ձեզ անհանգստացնո՞ւմ է Սիրիայից ահաբեկիչների տեղափոխումը Ադրբեջան։
Արաղչի. - Այո, շատ անհանգստացած ենք, և մեր անհանգստությունը փոխանցել ենք Բաքվին, և ես քննարկում եմ ունեցել այս հակամարտությունում բոլոր ահաբեկչական խմբերի ներկայության մասին։ Սա անընդունելի է։ Ես շատ արդյունավետ քննարկում եմ ունեցել Հայաստանի արտգործնախարարի հետ։ Ծավալուն քննարկում էր, շատ արդյունավետ, շատ օգտակար։ Կարծում եմ, որ հիմա մենք շատ լավ հասկանում ենք մեկս մյուսի մտահոգությունները և ավելի լավ հեռանկար ենք տեսնում ապագայի վերաբերյալ պատկերացումների առնչությամբ։
«Ազատություն». - Դուք այս հարցը քննարկե՞լ եք Ադրբեջանի իշխանությունների հետ։
Արաղչի. – Իհարկե։
«Ազատություն». Եվ վերջին հարցը, որո՞նք ենք հակամարտության կարգավորման ձեր նախաձեռնության հիմնական կետերը։
Արաղչի. - Ես մեր նախաձեռնությունը ներկայացրել եմ շահագռգիռ կողմերին և մենք սպասում ենք, որ նրանք ուսումնասիրեն, քննարկեն դա, դրանից հետո արդեն պատրաստ կլինենք խոսել այդ տարրերի մասին»։
Հայաստանի արտգործնախախարության տարածած հաղորդագրության մեջ նշված է, որ Մնացականյանն ու Արաղչին երկուստեք անհանգստություն են արտահայտել դեպի տարածաշրջան Մերձավոր Արևելքից միջազգային ահաբեկիչների տեղափոխման առնչությամբ՝ դիտարկելով դա որպես լուրջ սպառնալիք ողջ տարածաշրջանի համար:
Ինչ վերաբերում է իրանական առաջարկներին, ապա Հայաստանի արտգործնախարարը նշել է, որ դրանք հանգամանալից կուսումնասիրվեն:
Իրանի փոխարտգործնախարարը Երևան է ժամանել Մոսկվայից, ուր Ռուսաստանի փոխարտգործնախարար Անդրեյ Ռուդենկոյին էր ներկայացրել իրենց առաջարկները, որոնք, ըստ Արաղչիի, ընդգծում են՝ «օկուպացիան դադարեցնելու, պետությունների տարածքային ամբողջականությունը հարգելու, միջազգայնորեն ճանաչված սահմանների անխախտելիության, ինչպես նաև մարդու իրավունքներն ու փորքրամասնությունների շահերը պաշտպանելու և խաղաղ բնակչության ու բնակավայրերի դեմ բռնությունները դադարեցնելու անհրաժեշտությունը»։
Իրանցի դիվանագետը նաև հայտարարել է, որ առաջարկի նպատակը ղարաբաղյան հակամարտությունը տարածաշրջանային երկրների ջանքերով կարգավորելն է, ոչ թե դրանից դուրս գտնվող՝ Մինսկի խմբի անդամ-պետությունների մասնակցությամբ։
Էլ ավելի վաղ Աբբաս Արաղչին Բաքվում էր, ուր առաջարկը քննարկել էր նախագահ Իլհամ Ալիևի ու արտգործնախարար Ջեյհուն Բայրամովի հետ։ Ալիևի հետ մեկուկես ժամանոց հանդիպման արդյունքում, ըստ Արաղչիի, Բաքուն դրական է գնահատել Թեհրանի առաջարկները։