Ռուսաստանն ու Թուրքիան կպարզեցնեն վիզային ռեժիմը
Ռուսաստանի Դաշնությունն ու Թուրքիան վիզային ռեժիմի ազատականացման ուղղությամբ աշխատանքներ կիրականացնեն, իսկ մոտ ապագայում կլուծվի պրոֆեսիոնալ վարորդների համար վիզաների չեղարկման հարցը, հայտարարել է ՌԴ նախագահ Վլադիմիր Պուտինը ռուս-թուրքական բանակցությունների արդյունքներն ամփոփող մամուլի ասուլիսի ժամանակ:
Ինչպես հաղորդում է РИА Новости գործակալությունը, Ռուսաստանի նախագահը նշել է, որ Թուրքիան ռուս զբոսաշրջիկների շրջանում գնալով ավելի մեծ ժողովրդականություն է վայելում, և ընդգծել, որ անցած տարի Թուրքիայի Հանրապետությունում ռուս զբոսաշրջիկները թվով գերազանցել են այլ երկրներից ժամանած զբոսաշրջիկներին:
«Մենք մեր հերթին գնահատում ենք այն ուշադրությունը, որ թուրքական իշխանությունները հատկացնում են Թուրքիայում գտնվելու ժամանակ ռուսների անվտանգության և հարմարավետության ապահովմանը, և մտադիր ենք աշխատանքներ իրականացնել վիզային ռեժիմի փոխադարձ ազատականացման ուղղությամբ»,- ասել է Ռուսաստանի Դաշնության ղեկավարը:
Հիշեցնենք, որ այսօր ռուս-թուրքական բարձր մակարդակի համագործակցության խորհրդի ութերորդ հանդիպման շրջանակներում Կրեմլում կայացել է Պուտինի և Էրդողանի հանդիպումը: Բանակցությունների շրջանակում քննարկվել են երկկողմ հարաբերություններին վերաբերող առաջնահերթ հարցեր: